Argentina Federal Məhkəməsi prezident Xavyer Mileyin futbol klubları ilə bağlı fövqəladə fərmanının iki maddəsini dayandırıb...
Poliqon xəbər verir ki, bu barədə çərşənbə axşamı Argentina Futbol Assosiasiyası məlumat yayıb.
Dərnəyin istinad etdiyi məhkəmə qərarında, sənədin bu hissəsinin konstitusiyaya zidd elan edilməsi tələbi ilə Salto futbol liqasının açdığı iddiada fərmanın 335 və 345-ci maddələrinin “yekun qərara qədər” dayandırıldığı bildirilib.
Argentina İdman Konfederasiyası daha əvvəl xəbərdarlıq etmişdi ki, Mileyin futbol klublarına səhmdar cəmiyyəti olmaq imkanı vermək qərarı beynəlxalq idman təşkilatlarının sanksiyalarına səbəb ola bilər, çünki Beynəlxalq Olimpiya Komitəsinin və Beynəlxalq Futbol Federasiyasının nizamnaməsində hökumətin idman müəssisələrinin işinə müdaxiləyə görə cəza nəzərdə tutulur.
Argentina hökumətinin fikrincə, onların təklif etdiyi islahat Argentina futbol klublarının əcnəbilər tərəfindən alınması yolu ilə ölkəyə valyuta axınını asanlaşdıracaq.
Bundan əvvəl isə Əmək Mübahisələri Palatası sənədin əmək qanunvericiliyi ilə bağlı fəslini konstitusiyaya zidd hesab edirdi.
Ötən il dekabrın 20-də Miley fövqəladə fərman imzalaması ilə bağlı xalqa müraciət edib. Dövlət başçısı 30 əsas islahat sadalayıb ki, bunlara qiymətlərə nəzarətin aradan qaldırılması, beynəlxalq ticarəti asanlaşdırmaq üçün gömrük qaydalarının islahatı, dövlət şirkətlərinin özəlləşdirilməsinə hazırlıq və ixraca məhdudiyyətlərin qoyulmasına qadağa daxildir.
Ümumilikdə sənəddə mövcud qanunları dəyişdirən və ya ləğv edən 300-dən çox maddə var. Parlamentin hər iki palatası təsdiq etməzsə, fərman ləğv edilə bilər.
Poliqon.info