Tərtərdə növbəti səyyar görüş keçirildi

Tərtər rayon İcra Hakimiyyətinin başçısı Müstəqim Məmmədovun növbəti səyyar qəbul-görüşü rayonun Bəyimsarov kəndində keçirilib

PİA.AZ xəbər verir ki, görüşdə icra başçısının müavinləri, şöbə müdirləri, hüquq-mühafizə orqanlarının,  idarə, müəssisə və təşkilatların rəhbərləri iştirak ediblər. Görüşdə çıxış edən kənd sakinlərindən Mehriban Hüseynova Bəyimsarov kənd xəstəxanasının əsaslı təmir olunması, Bəhmən Bayramov kəndə təbii qazın verilməsinə ehtiyac olduğunu, Nəsibə Əsgərova işlə təmin olunmasına köməklik edilməsini, Hüseyin Alıyev köhnəlmiş işıq dirəklərinin və naqillərin yenisi ilə əvəz olunması, Tapdıq Əliyev təzə məhəllədə yolun təmirinə ehtiyac olduğunu bildiriblər.Səyyar qəbul-görüşü yekunlaşdıran Tərtər rayon İcra Hakimiyyətinin Başçısı  Müstəqim Məmmədov  əsası ulu öndər Heydər Əliyev tərəfindən qoyulmuş ictimai-siyasi sabitliyin hazırda möhtərəm Prezidentimiz İlham Əliyev tərəfindən uğurla davam etdirilməsindən, paytaxt Bakı şəhəri ilə yanaşı, regionların da sürətlə inkişaf etməsindən söz açıb. Rayon rəhbəri daha sonra Tərtər rayonunun sosial-iqtisadi inkişafının daha da sürətləndirilməsi istiqamətində həyata keçirilən proqramlardan danışıb, kəndlərin infrastrukturunun yaxşılaşdırılması üçün görülən işləri qeyd edib.Rayon rəhbəri sonda sakinlər tərəfindən irəli sürülən təkliflərin icrası üçün müvafiq strukturların rəhbərlərinə konkret tapşırıqlarını verib.Kənd sakinləri əhalinin problemlərinin həlli istiqamətində həyata keçirilən tədbirlərdən, rayonda aparılan abadlıq-quruculuq işlərindən razılıqlarını bildirərək, göstərilən diqqət və qayğıya görə dövlətimizin başçısına öz minnətdarlıqlarını bildiriblər.