ABŞ Venesuela rəsmilərinə qarşı sanksiyalar tətbiq edəcək
Poliqon xəbər verir ki, bu barədə Bloomberg Agentliyi mənbələrə istinadən məlumat yayıb. Agentlik yazır ki, ABŞ-ın məhdudlaşdırıcı tədbirləri həmin məmurların azad və ədalətli prezident seçkilərinin keçirilməsinə mane olmaları ilə bağlıdır.
Bloomberg tərəfindən görülən sənədə görə, sanksiyalar seçkilərin nəticələrini saxtalaşdırmaq üçün Nikolas Maduro ilə əlaqə saxlayan məmurları əhatə edəcək. Sanksiya siyahısına Venesuela Seçki Şurasının, Ali Məhkəmənin və SEBIN (daxili və xarici kəşfiyyat) üzvləri daxildir. Nəşr yazır ki, ABŞ Ədliyyə Nazirliyi bu həftə məhdudiyyətlər elan edə bilər.
Bloomberg qeyd edir ki, sanksiyalara məruz qalacaqlar arasında ABŞ-ın Nikolas Maduroya qarşı olanların repressiyalarında, həbslərində, mühakimələrində və işgəncələrində əli olduğunu hesab etdiyi təhlükəsizlik qüvvələrinin nümayəndələri də var. Ədliyyə Nazirliyinin sənədlərinə görə, departament rəsmiləri Maduro hökuməti ilə müxalifət arasında azad və ədalətli seçkilərin təmin edilməsinə dair razılaşmanı pozmaqda ittiham edib.
Xatırladaq ki, Venesuelada seçkilər iyulun 28-də keçirilib. Ölkənin Milli Seçki Şurasının məlumatına görə, hazırkı prezident Nikolas Maduro 51,2%, Edmundo Qonzales 44% səslə qalib gəlib. Müxalifət, exit-poll nəticələrinə istinad edərək, 73% nəticə ilə Qonzalesin qələbəsini elan etdi. Ölkə boyu etirazlar başlayıb.
Ən son məlumatlara görə, bu gün, sentyabrın 3-də Venesuela məhkəməsi Edmundo Qonzales barəsində həbs qərarı çıxarıb.
Poliqon.info