İsrail Haniyənin qətlinə görə məsuliyyəti üzərinə götürüb
Poliqon xəbər verir ki, bu barədə The Washington Post mənbələrə istinadən məlumat yayıb. Qəzetin yazdığına görə İsrail tərəfi HƏMAS-ın siyasi bürosunun rəhbəri İsmayıl Haniyənin öldürülməsi xəbərindən dərhal sonra bu qətldə əli olduğu barədə ABŞ-ı xəbərdar edib. Qeyd olunur ki, İsrail onun ölümü ilə bağlı şərh verməkdən rəsmən imtina edib.
Nəşrin həmsöhbətlərinin sözlərinə görə, Amerika rəsmiləri hərəkatın Siyasi Büro rəhbərinin ölüm xəbərinə “təəccüb və qəzəblə” reaksiya veriblər. Eyni zamanda, Vaşinqton İsmayıl Haniyənin ölümünü Qəzza zolağında atəşkəs əldə etmək üçün aparılan danışıqlara ciddi zərbə kimi qiymətləndirib. WP qeyd edir ki, onun ölümündən əvvəl Amerika rəsmiləri bu istiqamətdə irəliləyiş əldə etdiklərinə inanırdılar.
Nəşr yazır ki, ABŞ dövlət katibi Entoni Blinken İrana dolayı təzyiq göstərmək üçün diplomatik kampaniyaya rəhbərlik edib. WP qeyd edir ki, Blinken Qahirə, Bağdad və digər ərəb paytaxtlarında yüksək vəzifəli məmurlardan cavab tədbirlərində təmkin nümayiş etdirmələrini xahiş edib.
Qeyd edək ki, İsmayıl Haniyə iyulun 31-də Tehranda öldürülüb. O, İrana Məsud Pezeşkiyanın andiçmə mərasiminə gəlib.
Poliqon.info