HƏMAS və FƏTH İsrailə qarşı ortaq hərəkət edəcəklər?
Politoloq: “HƏMAS və FƏTH qruplaşmalarının barışması təəccüblü deyil”.
“HƏMAS və FƏTH qruplaşmalarının İsrailə qarşı ortaq hərəkət etməkləri gözləniləndir”.
Bu sözləri politoloq Kənan Novruzov HƏMAS və FƏTH qruplaşmalarının barışmasını Poliqon-a şərh edərkən qeyd edib.
Fələstin mənşəli HƏMAS və FƏTH qruplaşmaları uzun müddətdir davam edən qarşıdurmadan sonra barışıblar. Tərəflər arasında parçalanmanın bitməsi barədə razılıq Pekində imzalanıb.
HƏMAS və FƏTH-in barışması uzunmüddətli ola bilərmi? Eyni zamanda, onlar İsrailə qarşı ortaq hərəkət edəcəklər?
Mövzunu Poliqon-un əməkdaşı "Report" İnformasiya Agentliyinin əməkdaşı, politoloq Kənan Novruzov ilə müzakirə edib.
Kənan Novruzov: “Çox güman ki, HƏMAS və FƏTH qruplaşmaları arasındakı barışıq bir müddət davam edəcək”.
HƏMAS və FƏTH qruplaşmalarını masa arxasına gətirən səbəb də İsrailə qarşı birləşmək olduğunu düşünən politoloq əlavə edib ki, bəlkə də, təhlükə və təhdid olmasaydı onlar da birləşməzdilər:
“HƏMAS və FƏTH qruplaşmalarının barışması təəccüblü deyil. Çünki HƏMAS və FƏTH qruplaşmaları arasında müəyyən ziddiyyətlər olsa da, artıq onlar ortaq təhlükə və təhdidlə üzbəüzdürlər. Əslində bu təhdidin başında İsrail yox, ABŞ dayanır.
Bu gün ABŞ-ın xarici siyasətində əsas məqsədlərdən biri ərəb dövlətlərini, bu quruplaşmaları, islam quruplaşmaları zəiflətməkdir. Belə olan halda, təhlükəyə, təhdidə məruz qalan ərəblər arasında da ziddiyyətlər varsa, onların işi daha çətindir. Bu nöqteyi-nəzərdən HƏMAS və FƏTH qruplaşmaları arasında ziddiyyətlərin aradan qalxması gözlənilən idi. Çox güman ki, HƏMAS və FƏTH qruplaşmaları arasındakı barışıq bir müddət davam edəcək.
HƏMAS və FƏTH qruplaşmalarının İsrailə qarşı ortaq hərəkət etməkləri gözləniləndir. HƏMAS və FƏTH qruplaşmalarını masa arxasına gətirən səbəb də İsrailə qarşı birləşməkdir. Bəlkə də, təhlükə və təhdid olmasaydı onlar da birləşməzdilər”.
Nərminə UMUDLU Poliqon.info