ABŞ Məxfi Xidmətinin rəhbəri Trampa sui-qəsd cəhdini şərh edib
Poliqon xəbər verir ki, xanım Çitl hadisəyə görə məsuliyyəti öz üzərinə götürüb.
“Bütün məsuliyyət mənim üzərimdədir. Mən Məxfi Xidmətin direktoruyam və yoxlama apardığımızdan və işçilərimizi lazımi resurslarla təmin etdiyimizdən əmin olmalıyam”, deyə Kimberli Çitl ABC telekanalına bildirib.
Mitinq iştirakçılarının silahlı şəxsin atəş açmazdan bir müddət əvvəl damda görünməsi ilə bağlı xəbərləri şərh edən Kimberli Çitl həmin anla atışmanın başlaması arasında “çox qısa müddət” olduğunu deyib.
“Bu şəxsin axtarışı, onun tapılması və nəticədə zərərsizləşdirilməsi çox qısa müddətdə baş verdi və bu, işi çox çətinləşdirir” deyə Çitl bildirib.
Kimberli Çitlin dediyinə görə, mitinq günü məxfi xidmət əməkdaşları daxili perimetrə cavabdeh idilər və damından atəş açılan bina yerli polis tərəfindən qorunurdu.
Xatırladaq ki, Donald Trampa sui-qəsd iyulun 13-də Pensilvaniyada seçki kampaniyası zamanı baş verib. Güllə siyasətçinin sağ qulağının yuxarı nahiyəsindən keçib. Açılan atəşlər nəticəsində mitinq iştirakçılarından biri ölüb, ikisi ağır yaralanıb. Hücum edən 20 yaşlı Tomas Metyu Kruks səhnəyə doğru ilk atəşlər açıldıqdan dərhal sonra Gizli Xidmət əməkdaşları tərəfindən güllələnib.
Poliqon.info