Əlil arabasında oturan adam Osloda kral sarayına od vurmağa çalışıb
Oslodakı Kral Sarayına iki molotov kokteyli atılıb. Yanğın törətmək cəhdi əlil arabasında oturan şəxs tərəfindən edilib...
Poliqon xəbər verir ki, bu barədə Almaniyanın DPA agentliyi iyulun 9-da Norveç polisindəki mənbəyə istinadən məlumat yayıb.
“Elektrikli əlil arabasında oturan bir adam Oslodakı Kral Sarayına bir neçə yandırıcı əşya atıb”, deyə DPA-nın məlumatında bildirilir.
Qeyd edilir ki, binanın infrastrukturuna ziyan dəyməyib. Yanğın tez bir zamanda söndürülüb, xəsarət alan da olmayıb. Hücum etdiyi iddia edilən şəxs hadisə yerində saxlanılıb.
Hadisə şahidinin sözlərinə görə, şübhəli şəxs əlində bomba olduğunu iddia edib. Bundan sonra o, kral iqamətgahına doğru iki şüşə molotov kokteyli atıb.
Saxlanılan şəxsin hərəkətlərinin səbəbləri və motivləri hələ müəyyən edilməyib. Hadisənin bütün hallarının aydınlaşdırılması üçün araşdırma aparılır.
Poliqon.info