İfrat sağçıların təkbaşına hökümət qurması Fransanın və Avropa İttifaqının siyasətinə necə təsir edəcək?
Politoloq: “Fransada keçirilən seçkilərin nəticələrindən asılı olmayaraq bu ölkələrin xarici siyasətində elə də ciddi dəyişikliklərin olacağını düşünmürəm”.
“Ümumən deyə bilərik ki, hazırda Avropada partiyaların başlıca konsepsiyaları və təklifləri Avropaya miqrant axının qarşısının alınması, iqtisadi zəmində islahat aparılmasıdır”.
Bu sözləri politoloq Turan Rzayev Fransada keçirilən parlament seçkilərini Poliqon-a şərh edərkən qeyd edib.
Xəbər verdiyimiz kimi, Fransada keçirilən parlament seçkilərinin birinci turunda Makronun partiyası ağır məğlubiyyətə uğrayıb. İkinci turdan sonra isə “Milli Birlik” partiyasının təkbaşına hökumət qurmaq üçün gərəkli olan səsə sahib olacağı istisna olunmur.
Fransa seçkilərinin birinci turunu necə dəyərləndirmək olar və “Milli Birlik” partiyasının hökümət qurması Fransaya və Avropa İttifaqının siyasətinə necə təsir edəcək?
Avropa seçkilərini Poliqon-un əməkdaşı politoloq Turan Rzayev ilə müzakirə edib.
Turan Rzayev: “Fransa xarici siyasətində hər hansısa bir ciddi dəyişikliyin olmasını düşünmürəm”.
Seçkilərin nəticəsindən asılı olmayaraq hakimiyyətə gələcək partiyaların ideoloji və iqtisadi proqram baxımından bir-birlərinə çox yaxın olduğunu vurğulayan politoloq Poliqon-a bildirib ki, ropa miqyasında ciddi mənada islamofobiya, irqçilik və dözümsüzlük var:
“Fransada keçirilən seçkilərin nəticələrindən asılı olmayaraq bu ölkələrin xarici siyasətində elə də ciddi dəyişikliklərin olacağını düşünmürəm. Ümumiyyətlə, Avropa miqyasında sağ mərkəziçi partiyaların iqtidara gəldiyini biz daha çox müşahidə edirik. Hətta, sol partiyalar belə özlüyündə radikaldırlar. Yəni ümumən deyə bilərik ki, hazırda Avropada partiyaların başlıca konsepsiyaları və təklifləri Avropaya miqrant axının qarşısının alınması, iqtisadi zəmində islahat aparılmasıdır.
Ümumiyyətlə, Avropa miqyasında ciddi mənada islamofobiya, irqçilik və dözümsüzlük var. Bunun da paralelində rasizm, antisemitizm, hətta neofaşizm kimi ideologiyalar da yüksəlir. Yəni əksər sağçı partiyalar da bu istiqamətdə siyasi konsepsiyalarını qurublar.
Bu baxımdan, seçkilərin nəticəsindən asılı olmayaraq hakimiyyətə gələcək partiyalar demək olar ki, bir-birlərinə çox yaxındırlar. Təsadüfi deyil ki, onlar əksər hallarda koalision hökumətlər də qururlar. Bunu Fransaya da şamil etmək olar. Fransa xarici siyasətində hər hansısa bir ciddi dəyişikliyin olmasını düşünmürəm”.
Nərminə UMUDLU Poliqon.info