CNN: Rusiya NATO ilə birbaşa müharibədən qorxur, hibrid müharibə aparır...
Poliqon xəbər verir ki, bu barədə CNN telekanalı yazıb.
London Kral Kollecinin müdafiə sahəsi üzrə baş müəllimi Rod Torntonun sözlərinə görə, artıq Rusiya ilə əlaqəli bir sıra hücumlar var: "Son bir neçə ay ərzində bu xüsusi əməliyyat növlərinin sayında mütləq artım olub".
Qeyd edilir ki, bütün bu hadisələr ayrı-ayrılıqda kiçik görünsə də, birlikdə təhlükəsizlik ekspertlərinin Rusiyanın Qərblə hibrid müharibəsi adlandırdığı hadisəni əks etdirir.
Nümunə kimi, xüsusən də Praqada avtobus qarajını, Riqada İşğal Muzeyini, Londonda anbarı, Varşavada ticarət mərkəzini yandırmağa cəhd göstərilib.
"Aprel ayında alman polisi partlayışlar və yanğın törətməkdə şübhəli bilinən bir neçə nəfəri həbs edib və Fransa hakimiyyəti uğursuz partlayış nəticəsində yaralanan şübhəli bomba istehsalçısını saxladıqdan sonra antiterror təhqiqatına başlayıb", deyə nəşr yazır.
Rod Torntonun fikrincə, Rusiya NATO ilə genişmiqyaslı müharibəyə alternativ olaraq təxribat kampaniyasına əl atır və bunun onun üçün fəlakətli nəticələri olacaq.
"Rusiya hərbi doktrinasının bir hissəsi çoxdandır ki, NATO ilə döyüş meydanında üzləşmək cəhdindən yayınmağa çalışır, çünki onlar uduzacaqlarını bilirlər. Ruslar silahlı münaqişə həddinin altında olan hərəkətləri edirlər", deyə ekspert qeyd edib.
Onun fikrincə, hücumları qəsdən silahlı münaqişə həddinin altında saxlamaqla, Rusiya NATO daxilində daha çox nifaq salmağa ümid edir, çünki bundan sonra necə davam edəcəyi ilə bağlı dəqiq plan yoxdur.
Amerika Müharibənin Tədqiqi İnstitutunun Rusiya üzrə tədqiqatçısı Nikol Volkov hesab edir ki, Rusiyanın hazırda əsas məqsədi Qərbin Ukraynaya hərbi yardım axınını pozmaqdır.
"Bu hibrid əməliyyatlar Qərbin Ukraynanı dəstəkləmək əzmini zəiflətmək və Qərb daxilində birliyi pozmaq üçün Rusiyanın hərbi səylərinin bir hissəsidir", deyə ekspert bildirib.
O, Rusiyanın uzunmüddətli perspektivdə birbaşa qarşıdurmaya hazırlaşacağını istisna etmir:
"Rusiya NATO, Qərb və Avropa İttifaqına qarşı bu hibrid əməliyyatları gələcəkdə NATO ilə mümkün münaqişə üçün ənənəvi hərbi imkanlarını təkmilləşdirmək cəhdləri ilə birlikdə həyata keçirir".
Poliqon.info