Qərb bölgəsində güclü külək fəsadlar törədib - Yenilənib
"Report"un Qərb bürosunun məlumatına görə, daha ciddi fəsadlar Qazax rayonunda qeydə alınıb. Belə ki, fırtına nəticəsində çox sayda ağaclar aşıb, dam örtükləri dağılıb.
Külək yaşı 100-dən çox olan irigövdəli ağacları da kökündən çıxararaq aşırıb. Avtomobil yollarına aşan ağaclar və düşən dam örtükləri bir müddət tıxaca səbəb olub.
Həmçinin elektrik xətləri sıradan çıxıb, bir çox ərazidə elektrik enerjisinin verilməsi dayanıb.
Yağışla müşahidə olunan güclü külək bölgənin digər rayonlarında da müşahidə olunub. Daşkəsən rayonunun bəzi ərazilərində elektrik enerjisinin verilməsində fasilə yaranıb.
Gəncə şəhərində isə külək nəticəsində aşan irigövdəli ağaclardan biri vətəndaşlara məxsus avtomobillərin üzərinə düşüb, nəqliyyat vasitələrinə ciddi ziyan dəyib. Həmçinin bir neçə obyektin və evin dam örtüyü dağılıb.
Şəhərin bəzi hissələrində elektrik enerjisinin verilməsi hələ də bərpa olunmayıb.
Hazırda Gəncə şəhərində və ətraf rayonlarda külək zəifləsə də, yağışlı hava şəraiti davam edir.
***
Qərb bölgəsinin qeyri-sabit hava şəraiti səbəbindən fəsadlar yaranıb.
"Report"un Qərb bürosunun məlumatına görə, Qazax rayonunda yağışla müşahidə olunan güclü külək nəticəsində bir neçə ağac aşıb. Bəzi ərazilərdə elektrik enerjisinin verilməsində fasilə yaranıb.
Yağıntılı və küləkli hava qonşu rayonlarda da müşahidə olunur. Ağstafada yaşayış binasının dam örtüyü dağılıb.
Gəncə şəhərində isə fərdi evlərdən birinin dam örtüyü dağılıb, bir neçə ağaclar aşıb. Bəzi ərazilərdə elektrik enerjisinin verilməsi dayandırılıb.
Hava şəraitinin törətdiyi digər fəsadlar aidiyyəti qurumların əməkdaşları tərəfindən araşdırılır.
Hazırda bölgədə qeyri-sabit hava şəraiti davam edir.
Poliqon.info