Ermənistanda Avropa İttifaqına girmək üçün referendum keçirilə bilər...
“Demokratik Qüvvələrin Platforması” ölkə hakimiyyətinə 3-4 ay ərzində Avropa İttifaqına daxil olmaq üçün referendum keçirməyi təklif edir.
Poliqon Ermənistan mətbuatına əsasən xəbər verir ki, iyunun 21-də bu mövzuda parlament dinləmələrinin keçirilməsi nəzərdə tutulub. Bu gün isə bu mövzuda forum çağırılıb.
Forumda ictimai təşkilatların və siyasi partiyaların nümayəndələri bir araya gəlib. Hakim “Mülki müqavilə” partiyasının nümayəndəsi müzakirələrə qoşulmayıb.
“Bu, bizim tariximizdə 2-3 il əvvəl təsəvvür edə bilmədiyimiz dönüşdür”, - deyə forumda “Azad Vətəndaş” ictimai təşkilatının rəhbəri Hovsep Xurşudyan bildirib.
“Təşəbbüsün bir məqsədi var. Ermənistanı mümkün qlobal təlatümlərdən qorumaq və təlatümdən itkisiz çıxmaq”, deyə “Respublika” Partiyasının lideri Aram Sarkisyan bildirib. Siyasətçi qeyd edib ki, məsələ ictimai əhəmiyyət kəsb edir, ona görə də parlamentin Avropaya inteqrasiya komissiyasında müzakirələrə başlanılıb, Milli Assambleyada da dinləmələr keçiriləcək.
Qeyd edək ki, parlamentin Avropaya inteqrasiya daimi komissiyası iyunun 21-də “Ermənistanın Avropa İttifaqına daxil olmaq ərizəsi ilə bağlı referendumun keçirilməsi təklifi” mövzusunda parlament dinləmələri təşkil edəcək. Dinləmələrin keçirilməsi təşəbbüsü ilə bir sıra qeyri-parlament partiyalarından ibarət “Demokratik Qüvvələrin Platforması” çıxış edib.
Poliqon.info