İsveçrədəki sülh sammitində Rusiya qoşunlarının Ukraynadan çıxarılması tələb olunmayacaq...
Poliqon xəbər verir ki, bu barədə Yaponiyanın NHK telekanalı mənbələrə və bəyanat layihəsinə istinadən məlumat yayıb. Telekanal xəbər verir ki, sammitdə iştirak edən bəzi ölkələrin mövqeyinə görə Rusiya qoşunlarının Ukrayna ərazisindən çıxarılması məsələsi istisna edilib.
Telekanalın məlumatına görə, bəyanatın mətnində Ukrayna prezidenti Vladimir Zelenskinin sülh düsturundan cəmi üç bənd yer alacaq. Söhbət atom elektrik stansiyalarının təhlükəsizliyindən, ərzaq təhlükəsizliyindən və bütün əsirlərin azad edilməsindən və ukraynalı uşaqların Rusiyadan qaytarılmasından gedir. Bəyanat layihəsində Rusiyanın gələcək müzakirələrdə iştirakının vacibliyindən də danışılır.
Zelenski mayın sonunda sammitdə yalnız bu üç məqamın müzakirəsini təşviq etməyi planlaşdırdığını da bildirib. O, ümid etdiyini bildirib ki, ölkələr nəinki “formula” üzrə danışıqlar apara, həm də onun bəndlərinin həyata keçirilməsi üçün müəyyən addımlar atacaqlar.
Ukrayna Sülh Sammiti iyunun 15-16-da İsveçrənin Bürqenstok şəhərində keçiriləcək. Konfransa Avropa İttifaqı, BRİKS və G20 ölkələrindən 160-dan çox nümayəndə heyəti dəvət olunub. KİV-in məlumatına görə, Cənubi Afrika, Braziliya və Səudiyyə Ərəbistanı sammitdə iştirakdan imtina edib.
Rusiya sammitə dəvət edilməyib.
Poliqon.info