Ukrayna ordusu Krasnodara Qərb silahları ilə zərbələr endirib
Poliqon xəbər verir ki, bu barədə France Press Agentliyi məlumat yayıb. AFP-nin bir neçə mənbəyə istinadən verdiyi xəbərə görə, sonuncu dəfə Ukrayna Silahlı Qüvvələri müttəfiqlərinin silahları ilə Krasnodar yaxınlığındakı obyektlərə hücum edib. Agentlik hansı silahdan söhbət getdiyini dəqiqləşdirməyib.
Xatırladaq ki,bir gün əvvəl “Bild” nəşri mənbəyə istinadən yazıb ki, Ukrayna ən azı bir dəfə Qərb müttəfiqləri ilə Rusiyaya hücumların yolverilməzliyi ilə bağlı razılaşmanı pozub. Nəşrin məlumatına görə, Ukrayna Silahlı Qüvvələri Almaniyadan aldığı “Patriot” sistemindən istifadə edərək Rusiya ərazisinə hücum edib. Bild başqa təfərrüatları açıqlamayıb.
Qeyd edək ki, NATO-nun baş katibi Yens Stoltenberq mayın 25-də deyib ki, Ukrayna Rusiya ərazisini Qərb silahları ilə vurmaq hüququna malik olmalıdır. Fransa prezidenti Emmanuel Makron da Ukraynanın Rusiyaya Qərb silahları ilə zərbə endirməsinə icazə verilməsini müdafiə edib. Bu arada Ağ Evin Milli Təhlükəsizlik Şurasının strateji kommunikasiyalar üzrə koordinatoru Con Kirbi mayın 28-də keçirdiyi brifinqdə ABŞ-ın hələ də Amerika silahlarının bu şəkildə istifadəsinə qarşı olduğunu bildirib.
Poliqon.info