Rusiya Ermənistandakı səfirini geri çağırdı... - Moskva ilə İrəvan arasında iplər qopurmu?
Siyasi-şərhçi: “Son günlərdə İrəvanda vəziyyətin gərginləşməsi, keşiş Baqratın yürüşü və bunun fonunda səfirin geri çağrılması heç də təsadüfi deyil”.
“Rusiya höküməti öz səfirinə ehtimal olunan inqilab fonunda necə davranacağı ilə bağlı tapşırıqlar vermək üçündə çağrıla bilər”.
Bu sözləri siyasi-şərhçi Kamran Məmmədli Rusiyanın Ermənistandakı səfirini geri çağırmasını Poliqon-a şərh edərkən qeyd edib.
Bildiyimiz kimi Rusiyanın Ermənistandakı səfiri Sergey Kopırkın məsləhətləşmələr üçün Moskvaya çağırılıb.
Rusiya-Ermənistan arasında iplər qopurmu və Moskva artıq səbrinin qalmadığını nümayiş etdirməyə başlayır? Digər tərfdən, səfirin geri çağırması Bakı və İrəvan arasında sərhədlərin delimitasiyası ilə bağlı anlaşmayla əlaqəli ola bilərmi?
Rusiya-Ermənistan münasibətlərini Poliqon-un əməkdaşı siyasi-şərhçi Kamran Məmmədli ilə müzakirə edib.
Kamran Məmmədli: “Rusiya səfir vasitəsi ilə özünün Ermənistanda fəaliyyət göstərən 5-ci kalonuna mesajını çatdıra bilər”.
Rusiyanın Paşinyanı devirmək istədiyini xatırladan ekspert Poliqon-a bildirib ki, Rusiya öz əlaltılarının Ermənistanda hakimiyyətə gəlməsinə çalışması məlumdur:
“Ermənistanın Rusiyanı oyundan kənarlaşdırmaq istəyi və bu yöndən tədricən addımlar atması, Rusiyanın təsirindən qurtulmaq istəyi heç kəsə sirr deyil. Son günlərdə İrəvanda vəziyyətin gərginləşməsi, keşiş Baqratın yürüşü və bunun fonunda səfirin geri çağrılması heç də təsadüfi deyil.
Eyni zamanda Paşinyanın son günlərdə faktiki olaraq üstüörtülü şəkildə KTMT-nin iki ölkəsini müharibəyə hazırlığında Azərbaycana kömək etməkdə ittiham edən bəyanatları böyük rezonans doğurdu. Səfirin çağrılışı bu ilə əlaqəli ola bilər. Lakin ola bilsin ki, səbəb tək bu deyil.
Kamran Məmmədli: “Səfirin geri çağrılmasının altında heç də Ermənistan hakimiyyətinin leyhinə olacaq bir məsələ görünmür”.
Rusiya höküməti öz səfirinə ehtimal olunan inqilab fonunda necə davranacağı ilə bağlı tapşırıqlar vermək üçündə çağrıla bilər.
Üçüncü bir ehtimal isə, səfir vasitəsi ilə özünün Ermənistanda fəaliyyət göstərən 5-ci kalonuna mesajını çatdırmaq ola bilər.
Hər bir halda, Rusiyanın Paşinyanı devirmək istəyi və öz əlaltılarının hakimiyyətə gəlməsinə çalışması məlumdur. Səfirin geri çağrılmasının altında isə heç də Ermənistan hakimiyyətinin leyhinə olacaq bir məsələ görünmür”.
Nərminə UMUDLU Poliqon.info