HƏMAS lideri: İsrail ABŞ-ın İrana qarşı müharibədə iştirakını istəyir...
Poliqon xəbər verir ki, bunu HƏMAS-ın siyasi bürosunun rəhbəri İsmayıl Haniyə Türkiyənin Anadolu Agentliyinə müsahibəsində deyib.
HƏMAS liderinin sözlərinə görə, İsrailin baş naziri Benyamin Netanyahu Qəzzadakı müharibəni bitirmək istəmir, lakin onun əhatə dairəsini genişləndirmək niyyətindədir ki, regional xarakter alsın.
"Eyni şəkildə o, amerikalıların istənilən cəbhədə, xüsusən də İrana qarşı müharibədə iştirakını və ya İsrailə xidmət edən hərbi qanad olmasını istəyir", deyə Haniyə bildirib.
Amerika mətbuatının məlumatına görə, cümə günü gecə İsrail İrandakı hədəflərə məhdud cavab zərbəsi endirib. Partlayışların İsfahan şəhəri yaxınlığında baş verdiyi bildirilir.
İranın dövlət agentliyi IRIB bəyan edib ki, ölkənin bir sıra əyalətlərində hava hücumundan müdafiə sistemləri pilotsuz təyyarələrin yaxınlaşması nəticəsində işə düşüb. "Tasnim" xəbər verir ki, İsfahan əyalətindəki nüvə obyektləri tamamilə təhlükəsizdir.
Xarici işlər naziri Hüseyn Əmir Abdullahian İsfahan üzərində vurulan pilotsuz təyyarələrin heç bir zərər vermədiyini qeyd edərək, İsrailyönlü medianı hücumun nəticələrini şişirtməyə çalışmaqda ittiham edib.
Zərbə İranın İsrailə genişmiqyaslı raket hücumundan təxminən bir həftə sonraya təsadüf edib.
Poliqon.info