İsrail və İranın “kölgə” müharibəsi...

İran səfirliyinə hava hücumu getdikcə daha çox üzə çıxan “kölgə” müharibənin ən böyük hücumlardan biri oldu...

Poliqon xəbər verir ki, bu barədə The New York Times qəzeti yazıb. Nəşr qeyd edir ki, dünən İsrail döyüş təyyarələrinin Dəməşqdə İran səfirliyi kompleksinin bir hissəsi olan binaya hücumu nəticəsində İranın Yaxın Şərqdəki gizli əməliyyatlarına nəzarət edən azı üç yüksək səviyyəli komandir və dörd zabit həlak olub.

NYT-yə görə Suriyanın paytaxtı Dəməşqə endirilən zərbə, İran hərbi komandirləri və nüvə alimlərinin öldürülməsi ilə nəticələnən İsrail və İran arasında onilliklər davam edən kölgə müharibəsində ən ölümcül zərbələrdən biri olub. İsrailin Qəzza zolağında apardığı hərbi kampaniyaya görə ölkələr arasında gərginliyin artması ilə bu gizli müharibə açıq xarakter alıb.

Adının açıqlanmasını istəməyən dörd İsrail rəsmisi Dəməşqin hücumunun arxasında İsrailin olduğunu təsdiqləsələr də, binanın diplomatik statusa malik olduğunu təkzib ediblər.

Bununla belə, Suriyanın İrandakı səfiri Şəfiq Dayub deyib ki, zərbə diplomatik binaya endirilib, bu isə bütün beynəlxalq konvensiya və normaların açıq və tam pozulmasıdır.

Hücumdan sonra sosial mediada yayılan videoda səfirliyin yanındakı dağıdılmış bina, fotoşəkillərdə isə giriş qapısının konsulluq bölməsi olduğunu göstərən işarə ilə əks olunub. Səfirlik X platformasında bildirib ki, binada konsulluq şöbəsi və səfirin iqamətgahı yerləşib.

İran İslam İnqilabı Keşikçiləri Korpusunun bəyanatında deyilir ki, ölənlər arasında İranın Suriya və Livandakı gizli hərbi əməliyyatlarına nəzarət edən 65 yaşlı general Məhəmməd Rza Zahedi, daha iki general və Qüds qüvvələrinin dörd zabiti var.

Müharibələrin qarşısının alınması ilə məşğul olan qeyri-kommersiya təşkilatı olan Beynəlxalq Böhran Qrupunun İran direktoru Əli Vaez deyib ki, diplomatik obyektə hücum İranın öz ərazisinə edilən hücumla eyni mahiyyət daşıyır.

İsrail rəsmiləri binanın İslam İnqilabı Keşikçiləri Korpusunun forpostu olduğunu və onu qanuni hərbi hədəfə çevirdiyini bildiriblər.

Poliqon.info