Pakistandan qisas əməliyyatı: Əfqanıstana zərbələr endirilib, 8 nəfər ölüb...
Poliqon Reuters Agentliyinə istinadən xəbər verir ki, hadisə nəticəsində 8 qadın və uşaq həlak olub.
"The Khorasan Diary "portalının məlumatına görə, zərbələr Təhrik-i-Taliban Pakistan radikal qruplaşmasının yaraqlılarının sığınacaqları və düşərgələrinə endirilib. Zərbələrin hədəfi Pakistan-Əfqanıstan sərhədi yaxınlığındakı Ləman (Paktika əyaləti) və Paşa Mella (Xost əyaləti) yaşayış məntəqələri olub.
"Təxminən səhər saat 3:00 radələrində Pakistan aviasiyası sərhədə yaxın Xost və Paktika əyalətlərində mülki əhalinin evlərini bombalayıb", deyə Təşkilat sözçüsü Zabihullah Mücahid qeyd edib.
Ölkə hökumətinin sözçüsü zərbələri qətiyyətlə pisləyib və bunu ölkənin suverenliyinin pozulması adlandırıb. Pakistan ordusu və Xarici İşlər Nazirliyi Reuters-in sorğusuna cavab verməyib.
Zərbələr martın 16-da Pakistanın Xeyber-Paxtunxvadakı Mir Əlidəki hərbi bazasına hücum zamanı 7 pakistanlı əsgərin öldürülməsindən sonra edilib. Bu hücumu Pakistan ərazisinə Təhrik-i-Taliban Pakistan qruplaşmasının üzvləri təşkil edib. Qrup Pakistanın şimal-qərbində, Hayber-Paxtunxva əyaləti ilə Əfqanıstanla sərhəd arasında yerləşən Federal İdarə olunan Qəbilə Ərazilərində yerləşir. Pakistan prezidenti Asif Əli Zərdari hücuma görə qisas alacağına söz verib.
Poliqon.info