Üç ölkədə polis əməliyyat keçirib, saxta pul satan dəstə ifşa olunub
Poliqon xəbər verir ki, bu barədə DW telekanalı məlumat yayıb.
Qeyd olunur ki, polis təşkilat rəhbərləri də daxil olmaqla 14 nəfəri həbs edib.
İspaniya polisi şənbə günü həbslərin Barselona, Roma və Neapol şəhərlərində aparıldığını bildirib. Polis ötən ilin noyabrında Barselonada çoxlu sayda saxta əskinas aşkar edildikdən sonra araşdırmaya başlayıb. Polisin məlumatına görə, cinayətkar təşkilat İtaliya, Fransa, Yunanıstan və İspaniyada saxta əskinaslar satıb. Saxta pullar bankomatlardan və digər cihazlardan gözə dəymədən keçib.
"Əskinaslar çox yüksək keyfiyyətə malikdir, çünki onlar xüsusi mürəkkəblərdən, su nişanlarından və aşkarlama mexanizmlərindən yan keçmək üçün nəzərdə tutulmuş müxtəlif elementlərdən istifadə ediblər", deyə İspaniya Milli Polisinin sözçüsü Elisa Rebolo bildirib.
Polis Barselona hava limanında və şəhərin avtovağzalında saxta pulların paylayıcılarını saxladıqlarını bildirib. Onlar təxminən 70 min avronu saxta əskinaslarla daşıyıblar.
Bir neçə ölkədəki polis məmurlarının topladığı məlumata görə, təşkilatın müxtəlif ölkələrdə müxtəlif müstəqil ofisləri olub və onların hər biri prosesin müxtəlif hissələrinə cavabdehdir.
Məsələn, Neapolun mərkəzində yerləşən bir qrup saxta əskinasların istehsalı ilə məşğul olub. Polisdən gizlənmək üçün qrup daha sonra Roma yaxınlığındakı Rieti bələdiyyəsinə köçüb.
Digər qrup saxta əskinasların böyük partiyalarının daşınmasına cavabdeh olub.
Fevralın 13-də istintaq zamanı toplanmış məlumatlar əsasında İspaniya, İtaliya və Yunanıstan polisi hər bir ölkədə eyni vaxtda əməliyyat keçirib. İspaniya və İtaliya hakimiyyət orqanları əskinasları hazırlamaqda və yaymaqda şübhəli bilinən digər şəxslərin həbsinə Avropa orderləri verib.
Poliqon.info