Rusiyanın banan siyasəti - Ekvador Rusiya hərbi texnikasını ABŞ-a verməyəcək
Poliqon xəbər verir ki, Ekvador prezidenti bu barədə “CNN en Espanol” telekanalına müsahibəsində bildirib. Daniel Noboa Ekvadorun köhnə silahları ABŞ-a ötürməkdən imtina etdiyini təsdiqləyib.
“Rusiya bizim üçüncü ən böyük ticarət tərəfdaşımızdır. Bu konkret halda onlar haqlı olardılar, çünki biz silah transferi sxeminin iştirakçısına çevrilərdik. Biz bunu etməyəcəyik”, deyə Ekvadorun dövlət başçısı bildirib.
Daniel Noboanın sözlərinə görə, o, hərbi texnikanın daha sonra ABŞ tərəfindən Ukraynaya ötürülə biləcəyindən xəbərsiz olub.
“Bizi təəccübləndirən odur ki, Birləşmiş Ştatlar bu silahların Ukraynada silahlı münaqişədə istifadə ediləcəyini açıq şəkildə elan etdi və biz bunun bir hissəsi olmaq istəmirik”, deyə Ekvador prezidenti qeyd edib.
Qeyd edək ki, yanvarın əvvəlində Daniel Noboa “metal qırıntıları” adlandırdığı köhnə sovet hərbi texnikasını ABŞ-dan yeniləri ilə dəyişdirmək planlarını açıqlamışdı. Köçürüləcək hərbi texnikanın məbləği 200 milyon dollardır. Bundan sonra Rusiya Ekvadoru belə bir qərarın mənfi nəticələri ilə bağlı xəbərdar edib. Bir ay keçməmiş “Rosselxoznadzor” donqar milçəyi səbəbindən Ekvador bananlarının idxalını qadağan etdi. Sonra “Rosselxoznadzor” Ekvadordan olan beş şirkətə Ekvador hakimiyyətinin məsuliyyəti altında yenidən Rusiyaya banan tədarük etməyə icazə verdi. Bundan sonra Ekvador köhnə hərbi texnikanı ABŞ-a verməkdən imtina edib.
Poliqon.info