Çiçək xəstəliyinə bənzər "Alyaskapox" virusundan ilk ölüm halı qeydə alınıb
Poliqon xəbər verir ki, bu barədə Alyaska İctimai Media portalı Alyaska Səhiyyə Departamentinə istinadən məlumat yayıb.
"Bu, xəstəxanaya yerləşdirmə və ölümlə nəticələnən ağır "Alyaskapox" infeksiyasının ilk hadisəsidir. Xəstənin immun sistemi çox zəifləmişdi və bu da çox güman xəstəliyin ağırlaşmasına səbəb olub", deyə departament bildirib.
Kenai yarımadasında xərçəng xəstəliyindən müalicə olunan yaşlı kişi virusa yoluxub. Payızda bədənində ağrılı qırmızı papula görüb, bundan sonra ona antibiotiklər təyin edilib. O, noyabr ayında xəstəxanaya yerləşdirilib.
Xəstəxanada yaşlı kişidə çiçək xəstəliyini xatırladan səpgilər əmələ gəlib. Tibbi yardıma baxmayaraq, yaraların sağalması mümkün olmayıb. Onun həmçinin iştahsızlıq, kəskin böyrək çatışmazlığı və tənəffüs problemləri olub.
Səhiyyə Nazirliyinin məlumatına görə, o, evinin yanında yaşayan sahibsiz pişikdən yoluxmuş ola bilərdi. Pişik bir neçə dəfə ona toxunub.
"Alyaskapox" virusu çiçək xəstəliyi kimi, Orthopoxviruses cinsinə aiddir. İlk dəfə 2015-ci ildə mərkəzi Alyaskanın Fairbanks şəhərində bir xəstədə aşkar edilib. O vaxtdan bəri Alyaskada altı nəfər virusa yoluxub. Bütün infeksiya halları heyvanlarla təmasdan sonra baş verib. "Alyaskapox" əsasən xırda məməlilərdə - qırmızı sıçan və siçanlarda rast gəlinir. İtlər və pişiklər də virusu yaya bilər. Virusun insandan insana keçməsinə dair heç bir dəlil yoxdur.
Poliqon.info