Aİ Macarıstanın razılığı olmadan Ukraynaya 20 milyard avro ayıracaq
Poliqon xəbər verir ki, bu barədə Financial Times qəzeti mənbələrə istinadən məlumat yayıb. Nəşr qeyd edir ki, bu mexanizmdən istifadə etməklə Aİ ölkələri Macarıstanın Ukraynaya 50 milyard avro məbləğində yardıma veto qoymasını dörd il müddətinə aşmağı planlaşdırır.
Nəşrin mənbələrinə görə, Aİ ölkələri ümumi büdcə üçün maliyyə təminatlarını öz üzərinə götürəcək. Bu, Avropa Komissiyasına Ukraynaya kömək etmək üçün kapital bazarlarından lazımi məbləğdə borc almağa imkan verəcək. Oxşar mexanizm artıq koronavirus pandemiyası zamanı üzv ölkələrə 100 milyard avro yardım ayırmaq üçün istifadə edilib.
Belə bir mexanizm Aİ-yə üzv olan bütün ölkələrin razılığını tələb etmir, çünki qərarı kredit reytinqi yüksək olan ölkələr verəcək. Lakin Almaniya və Niderland kimi bəzi ölkələrdə bunu etmək üçün parlamentin icazəsi alınmalıdır.
Digər variant kimi Aİ səlahiyyətliləri Ukraynaya ucuz qısamüddətli kreditlər verməyi nəzərdən keçirir. Bu sxemə əsasən, Ukrayna 2023-cü ildə artıq 18 milyard avro alıb.
Eyni zamanda, qəzetin mənbələrinə görə, üzv ölkələr üçün prioritet məsələ Ukraynaya 50 milyard avro məbləğində yardımın razılaşdırılmasıdır. Nəşrin mənbələrinə görə, Avropa İttifaqının rəhbərliyi Ukraynaya martın əvvəlinə qədər yardım göstərəcəyinə söz verib.
Qeyd edək ki, dekabrın 15-də Avropa İttifaqının sammitində Macarıstanın baş naziri Viktor Orban Ukraynaya kredit və qrant şəklində 50 milyard avroluq yardımın verilməsinə veto qoyub. Bu məsələni müzakirə etmək üçün Aİ ölkələri 2024-cü ilin əvvəlində fövqəladə sammit keçirəcək.
Poliqon.info