Alimlər: COVID ilə ölüm riski qriplə müqayisədə 50% daha yüksəkdir
Sent-Luisdəki Vaşinqton Universitetinin alimlərinin fikrincə, mövsümi viruslar kəskin xəstəliklər sinfindən xroniki xəstəliklər sinfinə keçməlidir.Poliqon xəbər verir ki, Vaşinqton Universitetinin araşdırmasının nəticələri "The Lancet Infectious Diseases" jurnalında dərc olunub.
İşin müəllifləri COVID-19-a görə xəstəxanaya yerləşdirilən 81 min xəstənin, həmçinin mövsümi qripə görə xəstəxanaya yerləşdirilən təxminən 11 min insanın tibbi sənədlərini təhlil ediblər. Tədqiqat "Delta" və "Omikron" koronavirus variantlarının aktivlik dövrünü əhatə edib.
COVID-19-dan sağalmış xəstələrdə ölüm riski mövsümi qripə yoluxmuş xəstələrlə müqayisədə 50% yüksək olub. Alimlər viruslar və bütün orqan sistemlərinin 94 xəstəliyinin artması riski arasındakı əlaqəni araşdırıb. COVID-19-a yoluxma 64 xəstəliyin, qrip isə 6 xəstəliyin riskini artırıb. Koronavirus müxtəlif orqan sistemlərinə təsir edibsə, qrip əsasən ağciyərlərə təsir edib.
Həm COVID-19, həm də qriplə ölüm hallarının və yeni xəstəliklərin inkişafının yarıdan çoxu infeksiyadan sonra bir neçə ay ərzində baş verib, kəskin mərhələdə, yəni ilk 30 gündə deyil.
"Pandemiyadan əvvəl biz əksər virus infeksiyalarını bir qədər əhəmiyyətsiz hesab etməyə meylli idik. Bir neçə günə xəstələnəcəksən və yaxşılaşacaqsan. Ancaq görürük ki, bu, hamı üçün belə deyil. Bəzi insanlar uzun müddətli ciddi sağlamlıq problemləri ilə üzləşirlər. Biz bu reallığı dərk etməliyik, virus infeksiyalarını sadələşdirməyi dayandırmalı və onların xroniki xəstəliklərin mühüm səbəbləri olduğunu başa düşməliyik", deyə işin müəllifi, klinik epidemioloq Ziyad Əl-Əli bildirib.
Həm COVID-19, həm də mövsümi qrip üçün peyvənd ağır xəstəliklərin qarşısını ala, xəstəxanaya yerləşdirmə və ölüm riskini azalda bilər. Alimlər bu qənaətə gəliblər ki, bu, əhalinin həssas qrupları üçün xüsusilə vacibdir: yaşlılar və zəifləmiş immun sistemi olan insanlar.
Poliqon.info