Ermənistan və Azərbaycan qoşunların sərhəddən geri çəkilməsini müzakirə edirlər
Poliqon xəbər verir ki, bunu Ermənistanın xarici işlər naziri Ararat Mirzoyan Estoniyanın xarici işlər naziri Marqus Tsaxkna ilə birgə mətbuat konfransı zamanı deyib. Mirzoyan əlavə edib ki, Ermənistanın Baş nazirinin ofisi ilə Azərbaycan Prezidentinin Administrasiyası arasında etimadı artıran addımların müzakirəsi aparılır və saxlanılan hərbiçilərin azad edilməsi yeganə tədbir deyil.
“Saxlanılan hərbiçilərin mübadiləsi müzakirə edilən yeganə etimad yaradan saziş deyil. Digər məsələlər də də müzakirə olunub və müzakirə olunacaq. Məsələn, Ermənistan-Azərbaycan dövlətlərarası sərhədindən qoşunların çıxarılması ilə bağlı müzakirələr aparılır. Biz inanırıq ki, qoşunların çıxarılması həqiqətən müsbət təsir göstərəcək və mümkün yeni eskalasiyanın qarşısını almağa kömək edəcək. Mən demirəm ki, bu barədə razılığa gəlmişik. Bu, müzakirə olunan ideyadır”, deyə Mirzoyan başqa ideyaların da müzakirə olunduğunu qeyd edib.
Ermənistanın xarici işlər naziri ümidvar olduğunu bildirib ki, İrəvan və Bakının qarşılıqlı addımları iki ölkə arasında münasibətlərin tənzimlənməsinə müsbət təsir göstərəcək.
“Lakin əsas proses sülh müqaviləsi üzrə danışıqlardır. Hesab edirəm ki, Azərbaycan görüşlər formatında danışıqlar masasına qayıtmalıdır. Biz artıq dedik ki, işin böyük hissəsi görülüb və indi əsas məsələlərin yekun redaksiyası üzrə görüşmək və razılığa gəlmək lazımdır”, deyə Mirzoyan əlavə edib.
Poliqon.info