Ukrayna Polşa ilə münasibətləri düzəltmək üçün Tusku Kiyevə dəvət edib
Poliqon xəbər verir ki, bu barədə "Onet" nəşri mənbələrə istinadən məlumat yayıb.
Qeyd edilir ki, Kiyev hökuməti Tusk və Ukrayna prezidenti Volodimir Zelenski arasında potensial görüşün dekabrın 14-15-də Avropa İttifaqı liderlərinin sammitinin keçiriləcəyi Brüsseldə baş tutub-tutmamasından asılı olmayaraq səfəri təşkil etmək istəyir.
Mənbələrin bildirdiyinə görə, bu səfər Tuskun ilk xarici səfərlərindən biri olmalıdır və Polşanın yeni baş nazirinin təklifə razılıq verməsi ehtimalı var.
Qeyd edək ki, Polşa Seymi baş nazir Mateuş Moravetskinin hökumətinə etimadsızlıq səsverməsi keçirib. Bundan sonra Seym müxalifət koalisiyasından Tuskun baş nazir postuna namizədliyinin irəli sürülməsinə səs verib. O, səsvermədə iştirak edən yeganə namizəd olub. Onun lehinə 248 deputat səs verib, 201 deputat buna qarşı çıxıb.
Bundan əvvəl Tusk Ukrayna ilə münasibətlərdə ölkəsinin maraqlarını qətiyyətlə müdafiə edəcəyinə söz vermişdi. O əlavə edib ki, hökumət bütün qonşularla münasibətlərdə Polşanın maraqlarını qətiyyətlə müdafiə edəcək.
Poliqon.info