Danimarka parlamenti Quran yandırılmasını qadağan edib
Poliqon xəbər verir ki. bu barədə Danimarka Ədliyyə Nazirliyinin mətbuat xidmətinin məlumatında bildirilib. Mətbuat xidməti qeyd edib ki, bu qanun Danimarkada terror təhlükəsini artıran “sistemli təqibləri” dayandırmaq məqsədi ilə qəbul edilib.
Yeni qanuna əsasən, “dini icmalar üçün vacib olan müqəddəs mətnlərə, eləcə də müqəddəs kitablara oxşayan əşyalara açıq şəkildə pis münasibət göstərmək” cinayət sayılacaq. Qadağa “müqəddəs yazının kiçik bir hissəsini” ehtiva edən sənət əsərlərinə şamil edilmir.
Yeni qanunu pozanları cərimə və ya 2 ilə qədər həbs gözləyir. Qanun qüvvəyə minməzdən əvvəl Danimarka kraliçası II Marqret tərəfindən imzalanmalıdır. Qanunun 2023-cü ilin sonuna qədər imzalanması gözlənilir.
Reuters Agentliyinin məlumatına görə, təkcə 2023-cü ildə krallıqda 500-dən çox Quran yandırılıb. İslam Əməkdaşlıq Təşkilatı və onun bir çox üzvü bu cür hərəkətləri kəskin şəkildə pisləyib.
Qeyd edək ki, avqust ayında Quranla kütləvi etiraz aksiyalarına ev sahibliyi edən İsveçin hakimiyyət orqanları müqəddəs kitabların təhqir olunması ilə bağlı qanun qəbul etməyi planlaşdırmadıqlarını açıqlamışdılar.
Poliqon.info