Sallivan: Ukraynaya yardımın əleyhinə olanlar Putini dəstəkləyirlər...
Poliqon xəbər verir ki, bunu ABŞ prezidentinin milli təhlükəsizlik üzrə müşaviri brifinq zamanı deyib. Sallivan təsdiqləyib ki, Konqresin hərəkətsizliyi ABŞ administrasiyasının ilin sonuna kimi Ukrayna üçün silah və avadanlıq almaq üçün resurslarının tükənməsi təhlükəsini yaradır.
“İnanıram ki, Ukraynanın maliyyələşdirilməsini dəstəkləməyən hər hansı bir Konqres üzvü Putinin qalib gəlməsini asanlaşdıracaq nəticəyə səs verir. Yəni, Ukraynanın dəstəklənməsinə qarşı səsvermə Putinin strateji mövqeyinin yaxşılaşdırılması üçün səsvermədir. Ukraynaya əlavə maliyyə ayrılmasına qarşı səsvermə Ukraynaya ziyan vuracaq və Rusiyaya kömək edəcək ki, bu da demokratiyaya zərər verəcək və diktatorlara kömək edəcək”, deyə ABŞ prezidentinin köməkçisi brifinqdə deyib.
Qeyd edək ki, Ukrayna, İsrail və Tayvana yardımın maliyyələşdirilməsi məsələlərinə noyabrın 17-də təsdiqlənmiş ABŞ-ın müvəqqəti büdcəsindən ayrıca baxılır. Ağ Ev bu məqsədlər üçün 106 milyard dollar ayırmağı təklif edib ki, bunun da 61 milyard dollarından çoxu Kiyevə veriləcək.
NBC kanalı bir gün əvvəl ABŞ-ın Demokratik və Respublikaçı partiyaları arasında Ukraynaya maliyyə ayrılması ilə bağlı danışıqların nəticəsiz qaldığını bildirmişdi. Bloomberg yazıb ki, Ağ Ev ilin sonuna qədər Ukraynaya tədarük üçün resursların tükənəcəyi ilə bağlı ABŞ Konqresinə məktub göndərib.
Poliqon.info