SBU Rusiyadan Çinə gedən magistralın ən uzun tunelində partlayış törədib
Poliqon xəbər verir ki, bu barədə Amerikanın CNN telekanalı SBU-dakı mənbələrə istinadən məlumat yayıb.
CNN mənbəsi tuneldəki yanğını “SBU əməliyyatı” adlandırıb. Mənbənin sözlərinə görə, SBU əməkdaşları qatar hərəkət edərkən dörd partlayıcı qurğunu işə salıblar. Rəsmi olaraq SBU nümayəndələri insidentlə bağlı şərh verməyiblər. Sabotaj üçün tunelin seçilməsinin səbəbini izah edən mənbə bu marşrutu “Rusiya ilə Çin arasında yeganə əsas dəmir yolu əlaqəsi” olduğunu bildirib.
Noyabrın 29-da Buryatiyada Baykal-Amur magistral xəttinin 15 kilometrlik Severomuyski tuneli yanğın səbəbindən bağlanıb. Şərqi Sibir Nəqliyyat Prokurorluğu yük qatarının vaqonunun yandığını bildirib. Rusiya Dəmir Yolları qatar xidmətinin kəsilmədiyini və “hərəkət müddətində cüzi artım” ilə baş verdiyini söyləyib. Xəsarət alanlar barədə məlumat verilməyib.
Rusiya Dəmir Yolları yanğının səbəbini açıqlamayıb. “RBC-Ukrayna”, “Ukrayinska Pravda”, “Hromadske”, “Suspilne” və “Babel” də daxil olmaqla Ukrayna KİV-ləri mənbələrə istinadən bunun SBU-nun təxribatı olduğunu yazıblar.
“Baza” Telegram kanalı əvvəlcə yanğının mümkün səbəblərindən birinin kabel şəbəkəsində qısaqapanma olduğunu bildirsə də, sonradan hadisəni iki yanacaq çəninin partlaması nəticəsində baş verdiyini bildirib. “Shot “Telegram kanalının məlumatına görə, hüquq-mühafizə orqanları yanğının səbəbni təxribat kimi dəyərləndiriblər.
Poliqon.info