HƏMAS yüksək vəzifəli fələstinlilərin əvəzində kişi girovları azad etməyə hazırdır
Poliqon xəbər verir ki, bu barədə The Wall Street Journal nəşri öz mənbələrinə istinadən yazır.
Əldə olan məlumata görə, Misir, İsrail və Qətər nümayəndələrinin Dohada HƏMAS ilə görüşündən əvvəl humanitar fasilənin davam etdirilməsinin mümkünlüyü müzakirə olunub. HƏMAS İsrail həbsxanalarında saxlanılan yüksək vəzifəli fələstinlilərin müqabilində Qəzza zolağında saxlanılan kişi girovların azad edilməsi üçün danışıqlar aparmağa razılaşıb.
HƏMAS hərəkatının nümayəndələri danışıqlar iştirakçılarına Qəzza zolağında digər fələstinli qruplar tərəfindən saxlanılan bütün girovların yerini tapıb onları azad edə biləcəklərinə əmin ediblər. Eyni zamanda, İsrail hakimiyyəti 100 qadın və uşağın hamısı azad edilənə qədər danışıqların yeni mərhələsinə razılıq vermək niyyətində deyil.
Daha əvvəl bildirilmişdi ki, 30 fələstinli məhbusdan ibarət altıncı qrup Fələstinin HƏMAS hərəkatı ilə razılaşmaya əsasən İsrail hakimiyyəti tərəfindən həbsdən azad edilib.
Noyabrın 22-də tərəflər humanitar yardımın çatdırılmasını və girovların İsrailə təhvil verilməsi müqabilində fələstinli məhbusların İsrail həbsxanalarından azad edilməsini nəzərdə tutan müvəqqəti atəşkəs haqqında razılığa gəliblər. Noyabrın 27 və 30-da atəşkəs rejimi iki gün uzadılıb.
Poliqon.info