ABŞ Türkiyədən Rusiya və HƏMAS-a qarşı sanksiyalara əməl etməyi tələb edəcək
Poliqon xəbər verir ki, bu barədə Bloomberg Agentliyi mənbələrə istinadən məlumat yayıb. Xəbərdə qeyd edilir ki, Nelson türkiyəli həmkarları ilə görüşəcək və Ankaradan ABŞ-ın bir sıra Rusiya təşkilatlarına və HƏMAS-ın maliyyə fəaliyyətlərinə qarşı sanksiyalarına əməl etməyi xahiş edəcək.
Mənbələr Bloomberg-ə bildiriblər ki, ABŞ həmçinin bir sıra türk şirkətlərinə onların Qərb maliyyə sistemi ilə əlaqələrini poza biləcək mümkün sanksiyalar barədə xəbərdarlıq edib.
Qeyd edilir ki, Türkiyə limanlarına səfər edən Rusiya gəmilərinə və Türkiyə hava limanlarında yerüstü xidmət alan aviaşirkətlərə qarşı ABŞ-ın birtərəfli sanksiyalarını Türkiyənin dəstəkləməkdən imtina etməsi ABŞ-ı təşvişə salıb.
Bloomberg yazır ki, Nelsonun səfəri Türkiyə ilə ABŞ arasında onsuz da gərgin olan münasibətlərin üzləşdiyi yeni çağırışları vurğulayır. Türkiyə hökuməti HƏMAS-ı terror təşkilatı hesab etmir və bu yaxınlarda prezident Rəcəb Tayyib Ərdoğan bu qruplaşmanı Fələstin xalqının azadlığı uğrunda mübarizə aparan təşkilat kimi xarakterizə edib.
Bu arada Türkiyə ABŞ ilə münasibətlərini bərpa etmək və prezident Co Baydendən F-16 döyüş təyyarələri almaq və donanmasını modernləşdirmək üçün dəstək qazanmaq istəyir.
Xatırladaq ki, ABŞ Maliyyə Nazirliyinin Xarici Aktivlərə Nəzarət İdarəsi Rusiyaya hərbi istehsal üçün texnologiya tədarükünə kömək edən 130 fiziki və hüquqi şəxsə qarşı genişləndirilmiş sanksiyalar paketini açıqlayıb. Birləşmiş Ştatlar HƏMAS adından investisiya portfellərini idarə etdiklərinə və ya Rusiyaya sanksiyalardan yayınmağa kömək etdiklərinə görə təxminən onlarla türk firması və bir neçə şəxsə sanksiya tətbiq edib.
Poliqon.info