Bu gün Çexiyada ölkə tarixinin ən böyük tətili planlaşdırılır
Poliqon xəbər verir ki, bu barədə Çexiya-Moraviya Həmkarlar İttifaqları Konfederasiyasının (CMTU) rəhbəri Yozef Streduli bildirib. Bu, ölkə tarixində ən böyük aksiya olacaq.
Yozef Stredulinin sözlərinə görə, çexlər hazırkı vəziyyətdən qəzəbləniblər və hakimiyyətin onlara qulaq asmadığına inanırlar:
“Tətilin məqsədi respublika hökumətini cəmiyyətdə baş verənlər barədə düşünməyə məcbur etməkdir. Əgər onlar (ölkə hakimiyyət orqanları-red.) belə bir hərəkətin fərqinə varmamış kimi kənara çəkilə biləcəyini düşünsələr, bu halda cəmiyyətdə əhval-ruhiyyə daha da pisləşə bilər”.
Həmkarlar ittifaqlarının əsas narazılığına səbəb dövlət maliyyəsinin yaxşılaşdırılması üçün prezident Peter Pavel tərəfindən imzalanmış tədbirlər paketi, o cümlədən dövlət subsidiyalarının azaldılması, bəzi vergi güzəştlərinin ləğvi, bir sıra mal və xidmətlərə ƏDV-nin artırılması, və pensiyaların ödənilməsi şərtlərində dəyişikliklərdir. Həmkarlar ittifaqları və müxalifətin fikrincə, bu dəyişikliklər inflyasiyanın artmasına və vətəndaşların həyat səviyyəsinin aşağı düşməsinə səbəb olacaq.
Həmkarlar ittifaqları və işəgötürənlər tədbirlər paketini dəyişdirmək üçün 9 təklif irəli sürüb.
Bu gün respublikanın bütün bölgələrində mitinq və yürüşlərin keçirilməsi planlaşdırılır. Praqada etirazçılar parlament binası yaxınlığındakı Malostranska meydanına toplaşacaqlar. Tətildə nəqliyyat, dəmiryol, təhsil, səhiyyə, mədəniyyət, yeyinti və ağac emalı sənayesi işçilərinin həmkarlar ittifaqları da iştirak edəcək. Bir çox müəssisə istehsalı ən azı bir saat dayandırmağı planlaşdırır.
Poliqon.info