Misir Qəzza zolağından qaçqın qəbul etməkdən imtina edib
Poliqon xəbər verir ki, Misirin Baş naziri bu barədə Əl-Ariş şəhərində Şimali Sinay ağsaqqalları ilə görüşdə bildirib.
“Prezident Əbdülfəttah əs-Sisinin dediyi kimi, Misir höküməti bizə nəyinsə yüklənməsinə və ya regional problemlərin bizim hesabımıza həllinə icazə verməyəcək”, - deyə Madbuli qeyd edib.
Baş nazir əlavə edib ki, Misir hakimiyyəti yaxın illərdə yarımadanın yenidən qurulmasını maliyyələşdirəcək və onun inkişafı üçün planlarını genişləndirəcək.
“Heç kəs Misirin Sinayı tərk edəcəyini düşünməsin”, deyən Madbuli əlavə edib ki, ərazini qorumaq üçün, Misir milyonlarla insanın həyatını qurban verməyə hazırdır.
Xatırladaq ki, bundan əvvəl Associated Press Agentliyi İsrail kəşfiyyatının planı barədə məlumat yaymışdı. Bu plana görə Qəzza zolağında 2,3 milyon dinc sakin hərbi əməliyyatların əvvəlində Sinay yarımadasının şimalına köçürülməli idi. Əvvəlcə qaçqınların müvəqqəti çadır şəhərlərində yerləşdirilməsi, sonra onların yerində daimi şəhərlərin salınması nəzərdə tutulurdu.
Sənəddə Qəzza sakinlərinin köçürülməsi üçün digər mümkün ölkələrin arasında Türkiyə, Qətər, Səudiyyə Ərəbistanı, Birləşmiş Ərəb Əmirlikləri və Kanada da olub. Kəşfiyyat planı ilə tanış olan İsrail rəsmisi Associated Press-ə bildirib ki, sənəd məcburi deyil və təhlükəsizlik rəsmiləri ilə müzakirə olunmayıb.
Qeyd edək ki, Qəzza zolağında İsraillə HƏMAS qruplaşması arasında döyüşlər başlayandan bəri 8 mindən çox insan həlak olub, onların təxminən 70%-i qadın və uşaqlardır. BMT su, su, dərman və yanacaq çatışmazlığı səbəbindən anklavdakı vəziyyəti fəlakətli adlandırır.
Poliqon.info