İsveçrə NATO-ya üzv olur və neytrallıq siyasətindən əl çəkir?..
Poliqon xəbər verir ki, bu barədə İsveçrə Müdafiə Nazirliyinin mətbuat xidmətindən Rusiya Xarici İşlər Nazirliyinin bəyanatlarına cavab olaraq bildirilib.
Daha əvvəl Rusiya Xarici İşlər Nazirliyi bildirmişdi ki, İsveçrənin 11 anti-Rusiya sanksiyalar paketinə qoşulması bu ölkənin neytrallıq prinsipindən çıxması faktını təsdiqləyir, Bern daha aydın şəkildə NATO-ya doğru sürüklənir.
"Xeyr, NATO-ya üzvlükdən söhbət gedə bilməz, İsveçrə öz neytrallıq prinsipinə sadiq qalır", deyə İsveçrə Müdafiə Nazirliyi bildirib.
İsveçrə dövlət silah konserni RUAG-ın prezidenti Nikolas Perrin şənbə günü NZZ-yə verdiyi müsahibədə İsveçrənin NATO-ya üzvlük məsələsindən qaça bilməyəcəyini və gələcəkdə Alyansla daha sıx əlaqələrə malik olacağını deyib.
İsveçrə ordusunun komandanı Tomas Süsli daha əvvəl bildirmişdi ki, ölkə bitərəfliklə bağlı hüquqi öhdəliklərin artıq mövcud olmadığı bir zamanda əməliyyatlara hazırlaşmaq üçün NATO ilə əməkdaşlığı gücləndirəcək: "Bu fərqli mövqelər arasında heç bir ziddiyyət yoxdur. Söhbət İsveçrə neytrallığı siyasətinin ləğvindən getmir. Federal Şura neytrallığı qorumaqla yanaşı, İsveçrənin təhlükəsizlik və müdafiə siyasətini indiyə qədər olduğundan daha sistemli şəkildə beynəlxalq əməkdaşlığa yönəltmək istəyir".
İsveçrə Xarici İşlər Nazirliyinin 2022-ci il Xarici Siyasət Hesabatında qeyd olunub ki, ölkə NATO ilə təhlükəsizlik siyasəti sahəsində əməkdaşlığı gücləndirmək niyyətindədir. İsveçrə hərbçiləri 2023-cü ildə öz ərazisindən kənarda NATO ölkələrinin iştirak etdiyi 10 təlimdə iştirak edəcək. İsveçrənin 2023-cü ildə yeni xarici siyasət strategiyasında Rusiya ilə münasibətlərinə yenidən baxacağı da bildirilib.
İsveçrə 24 fevral 2022-ci ildən etibarən Rusiyaya qarşı demək olar ki, bütün Avropa sanksiyalarına qoşulub. Bern sanksiyalar çərçivəsində Rusiyanın 8,1 milyard dollarlıq aktivlərini bloklayıb. İsveçrənin Credit Suisse (CS) bankı ölkədə qeydiyyatdan keçmiş Rusiya aktivlərinin 1/3-dən çoxunu - 17,6 milyard frank (19,7 milyard dollardan çox) məbləğində bloklayıb və ya dondurub.
Poliqon.info