Afaq Bəşirqızı: "Dünyada qalib ölkənin vüqarlı vətəndaşı olmaqdan gözəl heç nə yoxdur”
İllərini sənətə vermiş, xalqın sevgisini qazanmış sənətkar üçün yeni yaş nə deməkdir, yaşın fərqi varmı?
Lent.az-ın bu sualını cavablandıran Afaq Bəşirqızı bildirdi ki, onun üçün yaşın fərqi var, həm də çox.
“Əlbəttə yaşın fərqi var. Yaşın gətirdiyi itkiləri danışmaq istəməzdim. Geniş auditoriyada bu söhbəti eləməzlər. Yaşın üstünə yaş gəlməsi, ağbirçək adını almaq, görüb-götürmüş olmaq, öz həyat təcrübəndən kimlərəsə tövsiyə etmək, onları ayıq-sayıq tutmağa çalışmaq insan üçün böyük bir şərəfdir” deyə o bildirib.
Bəs Xalq artisti tövsiyə verməyi və tövsiyə dinləməyi sevirmi?
“Çox nadir hallarda tövsiyə verirəm. Amma ömrünü düzgün yaşamış insanların qiymətli həyat təcrübəsi olur. Bundan istifadə etmək lazımıdr”,- deyə o bildirib.
Afaq Bəşirqızı ən böyük arzusunun artıq həyata keçdiyini də qeyd edib.
“Ən böyük arzum torpaqlarımızın işğaldan azad edildiyini görmək idi, gördüm. Tezliklə köçkün həyatı yaşamış teatrlarımız da öz şəhərlərinə geri dönəcək, Qarabağ yenidən mədəniyyətin beşiyi olacaq. Dünyada qalib ölkənin vüqarlı vətəndaşı olmaqdan gözəl heç nə yoxdur”,- deyə o bildirib.
Poliqon.info