Sinqapurda 20 ildən sonra ilk dəfə qadın edam edildi - Səbəb nədir?..
Poliqon xəbər verir ki, narkotik alverində təqsirli bilinən 45 yaşlı qadına ölüm hökmü tətbiq edilib.
Sinqapur Mərkəzi Narkotik Bürosunun məlumatına görə, ölkə vətəndaşı Saridevi Binte Camani haqqında edam hökmü bu gün, iyulun 28-də icra olunub. Onlar izah ediblər ki, Binte Camani əfv və cəzanın ömürlük həbslə əvəzlənməsi üçün vəsatət qaldırıb, lakin ona rədd cavabı verilib. Büroda qadına tətbiq edilən ölüm cəzasının üsulu açıqlanmayıb.
Şöbədən aydınlıq gətirilib ki, qadın 2018-ci ildə 30 qram heroini daşıdığı üçün saxlanılıb. Təhlükəsizlik qüvvələri onun daşıdığı narkotiki satmağa hazırlaşdığını müəyyən edib. Sinqapurda Narkotiklərdən Sui-istifadə Aktı qeyri-qanuni dövriyyədə olan heroinin miqdarı 15 qramdan çox olarsa, ölüm cəzasını nəzərdə tutur.
“Sinqapurda ölüm cəzası yalnız narkotik maddələrin böyük miqdarda qanunsuz dövriyyəsi kimi ən ağır cinayətlərə görə tətbiq edilir və bu, təkcə ayrı-ayrı narkomanlara deyil, həm də onların ailələrinə və bütövlükdə cəmiyyətə çox ciddi zərər vurur. Ölüm cəzası Sinqapurun hərtərəfli zərərin qarşısının alınması strategiyasının bir hissəsidir, həm narkotik tələbinə, həm də təklifinə diqqət yetirir”, deyə Sinqapur hüquq-mühafizə orqanları əlavə edib.
Sonuncu dəfə 2004-cü ildə Sinqapurda qadın edam edilib. Həmin vaxt narkotik vasitələrin qanunsuz dövriyyəsinə görə məsuliyyətə cəlb olunan 36 yaşlı yerli sakin asılaraq öldürülüb.
Sinqapur narkotik ittihamları ilə bağlı dünyada ən sərt qanunlarından birinə sahibdir və bu, dünya ictimaiyyətinin qəzəbinə səbəb olub.Hökumət iddia edir ki, ölüm hökmü cinayətə qarşı təsirli bir maneədir və təhlükəsizliyi təmin edir və o, həm də geniş ictimaiyyət tərəfindən dəstəklənir.
Sinqapurda hökumətin COVID-19 pandemiyası zamanı iki illik fasilədən sonra edamları bərpa etməsindən bəri ən azı 13 nəfər asılıb.
Poliqon.info