XİN rəsmisi: NATO-nun Çin xalqına "qan borcunu" var...
Poliqon xəbər verir ki, bunu Çinin Xarici İşlər Nazirliyinin sözçüsü Hua Çunin deyib.
"Biz Yuqoslaviyadakı Çin səfirliyini bombalamaqla NATO-nun Çin xalqına borclu olduğu qan borcunu unutmamışıq. Asiya-Sakit Okean ölkələri blok qarşıdurmasına və ya yeni Soyuq müharibəyə səbəb olacaq “NATO-nun Asiya-Sakit Okean versiyası” kimi müharibə maşını bizə xoş gəlmir", deyə o əlavə edib.
"Çinin məcburedici siyasəti var? Dünyada blok siyasəti və hərbi əməliyyatlar aparan, digər ölkələri güclə hədələyən, dünyanın maraqlarına, təhlükəsizliyinə və dəyərlərinə meydan oxuyan NATO deyilmi? Başqa ölkələrin daxili işlərinə qarışaraq, müharibələr apararaq, dünyada milyonlarla insanın əzab-əziyyətinə səbəb olmaqla beynəlxalq hüququ və beynəlxalq münasibətləri tənzimləyən əsas normaları ayaqlar altına atan NATO deyilmi?”, deyə çinli diplomat sual edib.
Çərşənbə axşamı blokun Vilnüsdə keçirilən illik sammitində iştirak edən NATO ölkələri kommunike qəbul etdilər, xüsusilə də Çinin "ambisiyaları və məcburedici siyasəti" blokun maraqlarına, təhlükəsizliyinə və dəyərlərinə meydan oxuyur. NATO üzvləri Çinin nüvə arsenalının genişləndirilməsi və şaxələndirilməsi ilə bağlı narahatlıqlarını ifadə ediblər. NATO həmçinin hesab edir ki, Çin və Rusiya arasında dərinləşən strateji tərəfdaşlıq onun dəyərlərinə və maraqlarına ziddir.
Kommunike əlavə edir ki, Aİ və NATO “Çin Xalq Respublikasının Avro-Atlantik təhlükəsizliyə qarşı qoyduğu sistemli çağırışları həll etmək üçün” öz addımlarını əlaqələndirəcəklər. Bundan əlavə, NATO müttəfiqləri ümumi təhlükəsizlik təhdidlərinə qarşı mübarizədə Avstraliya, Yeni Zelandiya, Cənubi Koreya və Yaponiya da daxil olmaqla Asiya-Sakit Okean regionundakı tərəfdaşları ilə əməkdaşlığı gücləndirməyə hazır olduqlarını bildiriblər.
Qeyd edək ki, 1999-cu ilin mayında NATO-nun Yuqoslaviyadakı əməliyyatı zamanı Çinin Belqraddakı səfirliyinə raket düşüb, 3 Çin vətəndaşı həlak olub. Alyans iddia edir ki, hadisə səhvən baş verib və yaxınlıqdakı Yuqoslaviya Federal Təchizat və Satınalma İdarəsinin binası hücumun hədəfi olub.
Poliqon.info