Amerika kəşfiyyatı: Priqojinin “Qiyam” əməliyyatı əvvəlcədən hazırlanıb...
Poliqon xəbər verir ki, The Washington Post və The New York Times qəzetlərinin yazdığına və CNN telekanalının məlumatına görə, Yevgeni Priqojin tərəfindən ölkənin hərbi rəhbərliyinə qarşı “Vaqner” ÖHŞ-nin qiyamı əslində əvvəlcədən hazırlanmış əməliyyat olub.
The Washington Post qəzetinin yazdığına görə, ABŞ kəşfiyyat orqanları Priqojinin Müdafiə Nazirliyi ilə silahlı qarşıdurmaya hazırlığı ilə bağlı kəşfiyyat məlumatları hələ iyunun ortalarında alıb. Vaşinqtondakı bir neçə mənbə şənbə günü nəşrə bildirib ki, ABŞ kəşfiyyatı bu planlar barədə Ağ Evi və digər rəsmiləri məlumatlandırıb.
“Amerika kəşfiyyat xidmətləri Priqojinin nə etmək istədiyini və planının həyata keçirilmə vaxtını dəqiq bilmirdi. Lakin məlumatın mötəbərliliyi və dəqiqliyi ABŞ rəhbərliyinə Rusiyada “nəyinsə düz getmədiyini” bildirmək üçün kifayət idi”, deyə The Washington Post qəzetinin həmsöhbətlərindən biri deyib.
Mənbələrə görə, Priqojin üçün əsas təkan Müdafiə Nazirliyinin iyunun 10-da bütün könüllü dəstələrin hərbi idarə ilə müqavilə imzalamalı olması barədə əmri olub.
“Son iki həftə ərzində Vaşinqtonda Rusiyada nələrin baş verə biləcəyi - Vladimir Putinin hakimiyyətdə qalıb-qalmayacağı və bunun ölkənin nüvə arsenalına necə təsir göstərəcəyi ilə bağlı narahatlıq yaranıb”. Qəzetin həmsöhbətləri bildirirlər ki, Vaşinqtonda rəsmilərin əsas qorxusu Rusiyada vətəndaş müharibəsi təhlükəsi olub.
CNN ABŞ kəşfiyyat mənbələrinə istinadən xəbər verir ki, həftənin əvvəlində ABŞ xüsusi xidmət orqanları “Vaqner” ÖHŞ-nin qüvvə və texnikasının Rusiya sərhədlərinə hərəkəti barədə Konqres liderlərini məlumatlandırıblar.
Qərb kəşfiyyatı ilə əlaqəsi olan bir CNN mənbəsi etiraf edib ki, iğtişaşın hazırlanması ən azı bir neçə gün çəkməli idi. Ancaq hər kəs bu qiymətləndirmə ilə razılaşmır. Vaşinqtondan olan digər mənbə xatırladıb ki, Rostov Ukraynada cəbhə xəttinə çox yaxındır və belə bir əməliyyat xüsusi hazırlıq tələb etmir.
The New York Times-ın məlumatına görə, ABŞ kəşfiyyatı çərşənbə günü yüksək rütbəli hərbçilərə və Co Bayden administrasiyasına Priqojinin Müdafiə Nazirliyi ilə hərbi qarşıdurmaya hazırlaşdığı barədə məlumat verib.
“ABŞ kəşfiyyat xidmətləri “Vaqner” təsisçisinin planının təfərrüatlarına malik deyildi”, deyə qəzet yazır. Lakin Ukraynaya işğalın başlanğıcında olduğu kimi, bu dəfə ABŞ kəşfiyyat orqanları öz məlumatlarını ictimaiyyətə açıqlamayıblar. Vaşinqton ehtiyat edirdi ki, Putin bu məlumatlardan ABŞ-ı Rusiyada dövlət çevrilişi təşkil etməkdə ittiham etmək üçün istifadə edə bilər. Qəzet yazır ki, bundan başqa, ABŞ rəsmiləri Putinə belə ağrılı zərbənin qarşısını almaqda maraqlı olmayıb.
Poliqon.info