Tokayev: Dünya “blok düşüncəsi” dövrünə qayıdıb...
Poliqon xəbər verir ki, Qazaxıstan prezidenti Kasım-Jomart Tokayev iyunun 8-də Astana Beynəlxalq Forumunun plenar sessiyasında dünyanın 30 il əvvəl “soyuq müharibə”nin başa çatması ilə yekunlaşan “blok düşüncəsi” dövrünə qayıtdığını bildirib.
“Bölünmə yalnız geosiyasi xarakter daşımır. Onların iqtisadi təsirləri də var. İqtisadi siyasətin özü açıq şəkildə silah kimi istifadə olunur”, deyə Tokayev bildirib.
Qazaxıstan prezidenti qeyd edib ki, qarşıduran tərəflər iqtisadi sanksiyalardan istifadə edir, ticarət müharibələri aparır, rəqibləri maliyyə mənbələrindən təcrid edir, investisiyalara nəzarət tətbiq edirlər. Bütün bunlar qlobal sülhün və rifahın əsaslarını sarsıdır.
Tokayev qeyd edib ki, bu tendensiyalar ölkələr daxilində və ölkələr arasında parçalanmalara və sosial gərginliyə səbəb olur.
“Mədəniyyət və dəyərlərdə genişlənən uçurum: bütün bu tendensiyalar ekzistensial təhdidlərə çevrilib”, deyə prezident bildirib.
Fikrini yekunlaşdıran Qazaxıstan prezidenti müharibə və münaqişə ideologiyasına son qoymağa çağırıb.
Poliqon.info