ABŞ Ukraynanı uzaqmənzilli raketlərlə təchiz etməyi planlaşdırmır...
Poliqon xəbər verir ki, bu barədə Politico nəşri yazır.
Nəşr qeyd edir ki, bəzi rəsmilərin fikrincə, ABŞ hazırda Böyük Britaniyanın Ukraynaya uzaqmənzilli raketlərin çatdırılması barədə açıqlamasından sonra bu problemi həll olunmuş hesab edir.
Amerika rəsmilərindən biri nəşrə deyib ki, “ABŞ-ın bununla bağlı siyasəti dəyişməyib”. Eyni zamanda, o qeyd edib ki, ABŞ Ukraynanı “Patriot”lar kimi hava hücumundan müdafiə vasitələri, döyüş sursatı və zirehli texnika ilə təmin etməyə davam edəcək.
Qeyd edək ki, Ukrayna müttəfiqlərindən uzaqmənzilli silahlar istəyir və onların müharibənin gedişatını kökündən dəyişə biləcəyini qeyd edir. Lakin ABŞ bütün bu müddət ərzində raketləri təmin etməkdən imtina edir.
Səbəblərdən biri də ABŞ ordusunun özündə bu raketlərin çatışmazlığıdır. Amerika həm də Ukraynanın Rusiya ərazisindəki hədəflərə zərbə endirmək üçün uzaqmənzilli silahlardan istifadə edəcəyindən qorxur.
Bundan əvvəl Britaniyanın Ukraynaya uzaqmənzilli raketlər göndərməyə hazırlaşdığı məlum olub. Söhbət 300 km-ə çatan “Storm Shadow” raketlərindən gedir. Bu, ABŞ-ın Kiyevə təhvil verməkdən imtina etdiyi ATACMS hərbi-taktiki raket sistemi ilə eyni məsafədədir. Eyni zamanda, Britaniya gələcək tədarüklərin vaxtını və miqyasını hələ göstərməyib.
Poliqon.info