Rusiya üzərində xüsusi tribunal üzrə koalisiyaya daxil olan 37 ölkənin liderləri distant sammit keçiriblər
Ukraynaya qarşı təcavüz cinayətləri üzrə xüsusi tribunalın qurulması üzrə Koalisiyada (Core Group) iştirak edən 37 ölkənin liderləri mayın 9-da görüş keçirərək belə bir mexanizmin yaradılması ideyasını dəstəklədiklərini təsdiqləyiblər.
“Report” xəbər verir ki, bu barədə Ukrayna Prezident Ofisi və Ukrayna Xarici İşlər Nazirliyi məlumat yayıb.
Ukrayna Prezidenti Volodimir Zelenskinin sədrliyi ilə keçirilən sammitə koalisiyaya üzv 37 ölkənin nümayəndələri qatılıb.
“Sammit Koalisiyanın birliyini nümayiş etdirib və sübut edib ki, Rusiyanın ali rəhbərliyinin təcavüz cinayətinə görə məsuliyyəti qaçılmazdır. Bütün iştirakçılar yekdilliklə Rusiyanın ali siyasi və hərbi rəhbərliyinin Ukraynaya qarşı təcavüzkar müharibənin başlamasına görə məsuliyyətə cəlb olunmasını dəstəklədiklərini bir daha təsdiqləyiblər”, - kommünikedə deyilib.
Yekunda koalisiya üzvü ölkələr belə bir ədalət mexanizminin yaradılması ideyasını dəstəklədikləri birgə bəyanat qəbul ediblər.
İclasda Avropa Komissiyasının sədri Ursula fon der Leyen də şəxsən iştirak edib.
“Aİ Rusiya Federasiyasının təcavüz cinayəti üzrə xüsusi tribunalının yaradılmasını dəstəkləyir. Bunun üçün ilk addım olaraq biz sübutlar toplamalı, saxlamalı və təhlil etməliyik. Bunun üçün Ukrayna qarşı Təcavüz Cinayətlərinin Araşdırılması üzrə Beynəlxalq Mərkəz yaradılmalıdır”, - o, görüşdən sonra bildirib.
Zelenski çıxışında xüsusi tribunal modeli və digər təfərrüatlarla bağlı müzakirələrin davam etdirilə biləcəyini qeyd edib, lakin vurğulayıb ki, “bu, tribunal olmalıdır”:
“Mən şadam ki, bizim aramızda tamamilə aydın razılıq var ki, cinayətə görə təcavüzkarın məsuliyyəti qaçılmaz olmalıdır. Bu, təcavüz cinayətinə görə təcavüzkarın məsuliyyətidir”, - o əlavə edib.
Poliqon.info