Sanders prezident seçkilərində iştirak etməkdən imtina edib...
Poliqon xəbər verir ki, bu barədə Associated Press Agentliyinin məlumatında bildirilib. Senator Berni Sanders növbəti dəfə ABŞ prezident seçkilərində iştirak etməyəcəyini bildirib və hazırkı prezident Co Baydenin namizədliyini dəstəkləyəcəyinə söz verib.
Qeyd edək ki, Sanders 2016 və 2020-ci illərdə Demokratik praymerizlərdə iştirak edib və hər iki dəfə uduzsa da, seçicilərdən çoxlu dəstək alıb.
“Ölkəmizin Donald Trampın hakimiyyətə qayıdışına qətiyyən ehtiyacı yoxdur. Mən hazırkı prezidentin yenidən seçilməsi üçün əlimdən gələni edəcəyəm”, deyə senator Associated Press-ə müsahibəsində deyib.
Onun sözlərinə görə, Baydenin 2024-cü ildə yenidən seçilməsinə konkret olaraq necə kömək edəcəyini söyləmək hələ tezdir.
Xatırladaq ki, dünən ABŞ-ın hazırkı prezidenti Co Bayden 2024-cü il prezident seçkilərində iştirak edəcəyini açıqlayıb. Co Bayden 20 yanvar 2021-ci ildən bəri ABŞ-ın 46-cı prezidentidir. Bu, onun dövlət başçısı kimi ilk müddətidir. 2009-2017-ci illərdə o, ABŞ-ın 47-ci vitse-prezidenti olub.
ABŞ-da prezident seçkiləri 2024-cü ildə keçiriləcək. Bundan əvvəl həm demokratlar, həm də respublikaçılar kimin namizəd olacağını seçməli olacaqlar.
Sanders müstəqil siyasətçidir, lakin Senatda Demokratlarla səs verir. Keçmişdə o, ABŞ-da müstəqil namizəd kimi iştirak etməyin sırf texniki baxımdan daha çətin olduğuna inandığı üçün Demokratların praymerizində iştirak edirdi. Sanders Senatda Demokratlar Partiyasının ifrat sol qanadının liderlərindən biri hesab olunur.
Poliqon.info