Paşinyan: "Qarabağdakı ermənilər mənim sözlərimi səhv başa düşür"
Poliqon bu barədə "Sputnik Ermənistan"a istinadən xəbər verir.
Çərşənbə günü Xankəndindəki separatçı rejim bəyan edib ki, onlar Paşinyanın Ermənistanın Azərbaycanın ərazi bütövlüyünü tanıması ilə bağlı sözlərini qəbuledilməz hesab edir və bunu Madrid prinsiplərinin bəndlərindən biri kimi əsaslandırmağa çalışırlar. Onların fikrincə, Ermənistan hakimiyyəti "Dağlıq Qarabağ əhalisi"nin təhlükəsizliyinin təmin edilməsi məsələsini öz müqəddəratını təyin etmək hüququndan ayırır.
"Mən ordan gələn fikirləri yaxından izləyirəm, yüksək qiymətləndirirəm, hörmət edirəm. Amma dediklərim başqa şeyə aiddir... Onlar adətən səhv başa düşürlər və ola bilsin ki, bu dəfə də belə olub. Amma mənim qiymətləndirmələrim çox aydındır", deyə Paşinyan jurnalistlərə bildirib.
Paşinyan vurğulayıb ki, Madrid prinsiplərində öz müqəddəratını təyinetmə hüququnun ifadəsi Ermənistanın Dağlıq Qarabağı Azərbaycanın tərkib hissəsi kimi tanıdığını deməyə əsas verir.
Onun sözlərinə görə, bu nəzərə alınmayıb və Ermənistanda beynəlxalq və geosiyasi vəziyyətlə heç bir əlaqəsi olmayan paralel reallıq var idi.
Qeyd edək ki, bundan əvvəl Paşinyan 2007-ci ildə qəbul edilmiş Madrid prinsiplərinin Dağlıq Qarabağın öz müqəddəratını təyin etməsinə mane olduğunu deyib.
Poliqon.info