SOCAR-ın keçmiş vitse-prezidenti vəfat edib
Azərbaycan Respublikası Dövlət Neft Şirkətinin (SOCAR) Geologiya və geofizika məsələləri üzrə keçmiş vitse-prezidenti Bəhram Hüseynov dünyasını dəyişib.
“Report” xəbər verir ki, Bəhram Bəhlul oğlu Hüseynov 1956-cı ildə Bakı şəhərində anadan olub.
1983-cü ildə Azərbaycan Neft və Kimya İnstitutunu "Faydalı qazıntı yataqlarının geofiziki üsullarla axtarışı və kəşfiyyatı" ixtisası üzrə bitirib və həmin ildən Qum adası dənizdə qazma işləri idarəsində geoloq və geoloji şöbənin böyük geoloqu vəzifələrində çalışıb. 1988-ci ilin iyulundan "Xəzərdənizneftqaz" İB İstehsalat Birliyinin baş ofisində Neft və qaz yataqlarının kəşfiyyatı üzrə geoloji şöbəyə böyük geoloq vəzifəsinə keçirilib, 1992-ci ildən geoloji şöbənin rəis müavini vəzifəsində çalışıb. 1993-1994-cü illərdə ABŞ-nin Amoko şirkətinin Talsa şəhərində olan elmi-tədqiqat mərkəzində ezamiyyətdə olub və birgə layihədə iştirak edib. Ezamiyyətdən qayıtdıqdan sonra Dənizdə Neft və Qazçıxarma İstehsalat Birliyində əmək fəaliyyətini davam etdirib.
O, 1995-ci ilin may ayından Azərbaycan Beynəlxalq Əməliyyat Şirkətində vitse-prezidentin müşaviri vəzifəsində, 1997-ci ilin iyun ayından geoloji şöbənin böyük geoloqu vəzifəsində çalışıb.
1998-ci ilin iyunundan bp şirkətinin operatoru olduğu "Şahdəniz" layihəsində geoloji kəşfiyyat qrupunun rəhbəri vəzifəsinə qəbul edilib. 2000-ci ilin martından 2002-ci ilin dekabr ayına qədər bp-nin Böyük Britaniyanın London ofisində ezamiyyətdə olub və "AÇG" yataqlarının II və III fazalarının işlənməsinin geologiya, geofizika və lay mühəndisliyi layihə qrupunun rəhbəri vəzifəsində çalışıb. 2002-ci ilin dekabrından 2011-ci ilin yanvarına qədər "AÇG" yatağının işlənməsi layihəsində geoloji qrupun rəhbəri, kəşfiyyat bölümündə yeni quyu planlaşdırılması qrupunun rəhbəri, "Azəri" yatağında hasilatın idarə olunması qrupunun rəhbəri, "Azəri" yatağında yeni quyuların layihələndirilməsi və yerinə yetirilməsi qrupunun rəhbəri vəzifələrində çalışıb.
2009-cu ildə Azərbaycan Prezidenti İlham Əliyevin Sərəncamı ilə "Tərəqqi" medalına layiq görülüb. 2011-ci ilin yanvarından SOCAR-ın Geologiya, geofizika və yataqların işlənməsi üzrə birinci vitse-prezidentinin müavini vəzifəsinə, 18 aprel 2016-cı il tarixindən isə Geologiya və geofizika məsələləri üzrə vitse-prezidenti təyin edilib. B.Hüseynov Prezident İlham Əliyevin 2021-ci ildə imzaladığı sərəncamla bu vəzifədən azad edilib.
Poliqon.info