Ukrayna Rusiya ilə hər hansı danışıqlardan imtina edir
Ukrayna Milli Təhlükəsizlik və Müdafiə Şurasının katibi Aleksiy Danilov bildirib ki, Ukrayna tərəfi Rusiya ilə heç bir danışıqlar aparmaq niyyətində deyil. O, Rusiya Silahlı Qüvvələrini Ukrayna ərazisini tərk etməyə dəvət edib və Kiyevin öz torpağında lazım bildiyini edəcəyini vurğulayıb.
PİA.az xəbər verir ki, Danilov bunu “Ukrayna-24” telekanalının efirində deyib.
“Rusiya tərəfi ilə heç bir danışıqlar aparılmayıb, aparılmayacaq da”, deyə Danilov vurğulayıb.
Ukrayna Milli Təhlükəsizlik və Müdafiə Şurasının Twitter səhifəsində də müvəqqəti atəşkəs barədə məlumatı yalan və ikiüzlülük adlandırıb.
Qeyd edək ki, yanvarın 5-də Rusiyanın müdafiə naziri Sergey Şoyqu Rusiya prezidentinin tapşırığı ilə Ukraynada bütün təmas xətti boyunca müvəqqəti atəşkəs elan edib. Atəşkəs rejimi yanvarın 6-sı saat 12:00-dan qüvvəyə minəcək və yanvarın 7-si günün sonuna qədər davam edəcək.
Xatırladaq ki, yanvarın 5-də səhər saatlarında Moskva və Bütün Rusiyanın Patriarxı Kirill belə bir təşəbbüslə çıxış edib. Patriarx Moskva və Kiyevi yanvarın 6-sı saat 12:00-dan yanvarın 7-si saat 24:00-dək Milad bayramı ilə əlaqədar atəşkəs elan etməyə çağırıb. Din xadimi bunu onunla izah edib ki, pravoslavlar Milad ərəfəsində və Məsihin mövludu günü dini mərasimlərdə iştirak edə bilməlidirlər.
Ukrayna prezidentinin aparat rəhbərinin müşaviri Mixail Podolyak isə bu təşəbbüsə cavab olaraq bildirib ki, Rusiya yalnız qoşunları işğal olunmuş əraziləri tərk edəcəyi təqdirdə atəşkəsə ümid edə bilər.
pia.az