Gömrükdə aparılan islahatlar və kadr dəyişiklikləri... - Müsbət irəliləyişlər var?
İqtisadçı-ekspert: “Gömrük Komitəsində yeni rəhbərliyin gücündə olan bəzi məsələlər var ki, o məsələlər həll edilə bilər”.
“Əsas olaraq Gömrük Komitəsi bəyannamə qiymətini artırmamalıdır. Şərtlər və şirkətlər arasında olan sövdələşmə qiymətlərinə üstünlük verilməlidir”.
Bu sözləri iqtisadçı-ekspert Nazim Bəydəmirli gömrükdə aparılan kadr islahatlarını PİA.az-a şərh edərkən qeyd edib.
Son zamanlar gömrükdə aparılan kadr dəyişiklikləri sürətlənib. Səfər Mehdiyevin vəzifədən alınmasından sonra Gömrük Komitəsinin işində hansısı müsbət irəliləyişlər hiss olunurmu? Gömrükdə iş adamlarına və vətəndaşlara münasibət dəyişibmi?
Gömrük sahəsindəki dəyişiklikləri PİA.az-ın əməkdaşı iqtisadçı-ekspert Nazim Bəydəmirli ilə müzakirə edib.
Nazim Bəydəmirli: “Çox təəssüf ki, suni qiymət artımını yaradan Gömrük Komitəsinin özü idi”.
Şahin Bağırovun intellekti və səviyyəsinin əvvəlki sədrdən fərqləndiyini qeyd edən ekspert PİA.az-a bildirib ki, yeni sədrin şəxsi keyfiyyətləri yüksəkdir:
“Gömrük sahəsində Səfər Mehdiyevin dövrü ilə müqayisə edilməyəcək dərəcədə dəyişikliklər var. Təbii ki, yeni rəhbərliyin gücündə olan bəzi məsələlər var ki, o məsələlər həll edilə dı bilər. Artıq yerlibazlıq, qohumbazlıq tarixdə qalmış olsun. Çünki Səfər Mehdiyevin vaxtında Gömrük Komitəsini Nehrəm Gömrük Komitəsi adlandırırdılar.
Eyni zamanda sahibkarların, əhalinin incidilməsi yerli mətbuat orqanlarına çox tez-tez çıxırdı. Bəyannaməsi qiyməti şişirdilirdi. Yəni insanlar müqavilə ilə xaricdən mal gətirirdilər. Gömrük işçiləri də bəyannamə qiymətini artırırdı. Belə hadisələr kütləvi hal almışdı. Çox təəssüf ki, suni qiymət artımını yaradan Gömrük Komitəsinin özü idi.
Hələ ki, Şahin Bağırovun Gömrük Komitəsinə sədr təyin olunmasından az bir müddət keçir. Mən Şahin Bağırovu tanıyıram, onunla eyni vaxtda müxtəlif universitetlərdə oxumuşuq və müxtəlif verlişlərdə debat aparmışıq. Şahin Bağırovun intellekti və səviyyəsi əvvəlki sədrdən fərqlənir. Onun şəxsi keyfiyyətləri də yüksəkdir.
Nazim Bəydəmirli: “Biz həm bir sahibkar, həm də bu sahənin bilicisi olaraq müəyyən monitorinq aparırıq, müqayisə edirik”.
Amma gömrüyün instusional problemləri var ki, onu Şahin Bağırov həll edə bilməz. Yəni bu problemlər daha yuxarıdan həll olunmalıdır. Gömrük və vergi siyasəti vahid mərkəzdən aparılmalıdır. Biz həm bir sahibkar, həm də bu sahənin bilicisi olaraq müəyyən monitorinq aparırıq, müqayisə edirik.
Əsas olaraq Gömrük Komitəsi bəyannamə qiymətini artırmamalıdır. Şərtlər və şirkətlər arasında olan sövdələşmə qiymətlərinə üstünlük verilməlidir. Qanunun da tələbi budur. Belə olan halda narazılıqlar da yaranmaz. Gömrük Komitəsindən narazılıqların mütləq əksəriyyəti bəyannamə qiymətinin artırılmasıdır. Kimsə gömrüyün razılığını onların bəyannamə qiymətini artırırdılar. Guya büdcəyə artıq pul ödəməli idi. Bu da narazılıqlar yaradırdı.
Bütün bunlar da gömrük siyasətinə uyğun deyil. Daxildə istehsal olunmayan malları sahibkarlar xaricdən ucuz tapırlar, alırlar, amma gömrük bunu qəbul etmirdi. Bu da sahibkarlara, vətəndaşlara mənfi təsir edirdi. Çünki ərzaq və digər məhsulların Azərbaycanda qiymətləri artıb. Bir daha qeyd edim ki, qiymət artımını da suni şəkildə Gömrük Komitəsi edirdi.
Ümid edirəm ki, bunların hamısı keçmişdə qaldı”.
Nərminə UMUDLU pia.az