Erməni separatizminin Vardanyan dönəmi – Separatçıların içində nələr baş verir?..
Rus sülhməramlılarının nəzarəti altında olan ərazidə fəaliyyət göstərən erməni separatçılarının yeni peyda olmuş “lideri” Ruben Vardanyan Paşinyana yaxın olan adamları ətrafına toplamaqdadır.
PİA.az xəbər berir ki, bu barədə Ermənistanın “mediahub” resursu məlumat yayıb. Erməni resursu qeyd edir ki, Vardanyan onun nəzarətinə verilən ərazidə əsl “kadr qırğını” siyasətini yürüdür. “Vəzifə”lərindən azad olunanları isə Paşinyana rəğbəti ilə seçilən şəxslərlə əvəz edir.
“Söhbətimiz zamanı Vardanyan mənə belə dedi: Mən bilirəm ki, sən vətənpərvər oğlansan, amma mənim komandamda sənə yer yoxdur”.
Bunu “Mediahub” resursuna dekabrın 19-da Qarabağdakı erməni separatçı anklavının “dövlət naziri” Vardanyan tərəfindən işdən çıxarılan Artur Ayrapetyan deyib.
Onun sözlərinə görə, Kreml tərəfindən himayə olunan Vardanyan “öz komandasını” formalaşdırmaq üçün Ermənistanın baş naziri Paşinyana rəğbət bəsləyən şəxsləri cəlb edir. Məsələn, onun yeni müşaviri Arakelyan əvvəllər Nikolun müşaviri və Ermənistanın əmək və sosial məsələləri naziri olub.
Ayrapetyan əlavə edib ki, onun işdən çıxarılmasına səbəb Vardanyanın anklavda Ermənistan hakimiyyətinin siyasətinə qarşı olan insanlardan xilas olmaq niyyətidir.
pia.az