Yaşıllıqların mühafizəsi və götürülməsinə dair ictimai dinləmə keçirilib
Dövlət Ekoloji Ekspertiza Agentliyi (DEEA) tərəfindən yaşıllıqların mühafizəsi və götürülməsi ilə əlaqədar icra hakimiyyəti nümayəndələri, bələdiyyələr, həmçinin media təmsilçilərinin iştirakı ilə növbəti ictimai dinləmə keçirilib. Tədbirin məqsədi yaşıllıqların götürülməsinə dair ekoloji rəyin alınması sahəsində şəffaflığın təmin edilməsi, bələdiyyə və icra hakimiyyəti orqanlarına yaşıllığın götürülməsi üçün verilmiş rəylərin icra vəziyyətinin müzakirəsi, həmçinin ictimaiyyət və jurnalistlər üçün maarifləndirmə xarakterli olub.
DEEA-nın İdarə Heyətinin sədri Mirsalam Qənbərov bildirib ki, fəaliyyətləri çərçivəsində müraciətlərin operativ cavablandırılması, dövlət qurumları və vətəndaş cəmiyyəti institutları ilə sıx əməkdaşlığın qurulması agentliyin əsas prinsiplərindən biridir.
AZƏRTAC xəbər verir ki, Bakı şəhəri Nəsimi, Nizami və Xətai rayon icra hakimiyyəti rəsmilərinin və bələdiyyələrinin iştirakı ilə təşkil olunan görüşdə ətraf mühitin yaxşılaşdırılması, yaşıllıqların qorunması, müraciətlərə operativ cavab verilməsi, yaşıllığın mülkiyyətçiləri tərəfindən ağac və kolların cari vəziyyəti ilə bağlı mütəmadi monitorinqlərin keçirilməsi, xüsusən təhlükə yaradan, xəstə, qurumuş ağacların vaxtlı-vaxtında aşkarlanaraq müvafiq addımların atılması ətrafında rəylər bildirilib.
Tədbirdə, həmçinin səsləndirilən təkliflərə dair fikir mübadiləsi aparılıb və praktikada ortaya çıxan çətinliklərin həll yolları axtarılıb.
Qeyd edək ki, DEEA tərəfindən mütəmadi olaraq paytaxt Bakı şəhərində və regionlarda bu cür maarifləndirici ictimai dinləmələrin keçirilməsi nəzərdə tutulub.
pia.az