Allahşükür Paşazadə Tbilisidə camaat namazında iştirak edib
Qafqaz Müsəlmanları İdarəsinin (QMİ) sədri Şeyxülislam Allahşükür Paşazadənin rəhbərliyi ilə Tbilisi Cümə məscidində camaat namazı qılınıb.
“Report”un yerli bürosu xəbər verir ki, namazda Gürcüstan Müsəlmanları İdarəsinin (GMİ) sədri Şeyx Hacı Ramin İgidov, Şərqi Gürcüstanın müftisi Etibar Eminov, Qərbi Gürcüstanın müftisi Adam Şantadze, Azərbaycanın Gürcüstandakı səfiri Faiq Quliyev də iştirak edib.
Din xadimləri Azərbaycan və Gürcüstanda sülh, əmin-amanlığın hökm sürməsi üçün dualar ediblər.
QMİ sədri GMİ-nin rəhbər şəxsləri ilə görüş də keçirib. Görüşdə Gürcüstan hökumətinin müsəlman icmasına qayğı və dəstəyindən söz açılıb, Gürcüstan və Azərbaycan arasında dini sahədə əməkdaşlıq məsələləri müzakirə olunub.
Şeyxülislam A.Paşazadə Gürcüstanın azərbaycanlı icmasının dövlətçilik naminə gördüyü işləri yüksək qiymətləndirib. O, din xadimlərinə işğaldan azad olunan Qarabağ torpaqlarını ziyarətə görə minnətdarlığını bildirərək qeyd edib ki, bu səfər Azərbaycanda çox yüksək dəyərləndirilib. GMİ sədri öz növbəsində rəhbərlik etdiyi qurumun fəaliyyət istiqamətləri barədə ətraflı məlumat təqdim edib, Azərbaycanla dini sahədə əməkdaşlığın xüsusi önəm kəsb etdiyini bildirib.
pia.az