ÇL: Dünya çempionları meydana itkilərlə çıxır
UEFA Çempionlar Liqasında (ÇL) 1/8 final mərhələsinin daha 2 oyunu keçiriləcək.
“Çelsi” İngiltərədə Fransanın “Lill” klubu ilə üz-üzə gələcək. Gecənin digər oyununda İtaliya “Yuventus”u İspaniyada “Vilyareal”la qarşılaşacaq.
UEFA Çempionlar Liqası
1/8 final, ilk oyunlar
22 fevral
00:00 “Çelsi” (İngiltərə) – “Lill” (Fransa)
Baş hakim: Xesus Xil Mansano (İspaniya)
London. “Stemford Bric” stadionu
Oynamayacaqlar: Ben Çilvell, Kolum Hadson-Odoy, Ris Ceyms (hər üçü “Çelsi”)
Oynayacağı sual altında olanlar: Sesar Aspilikueta, Meyson Maunt (hər ikisi “Çelsi”)
Çempionlar Liqasının son qalibi və klublararası son dünya çempionu “Çelsi” bu matçın favoritidir. Bu komandalar sonuncu dəfə 2019-cu ildə bu turnirin qrup mərhələsində qarşılaşıb. 11 dekabr 2019-cu ildə Londonda baş tutmuş matçda “Çelsi” 2:1 hesabı ilə qalib gəlib. Qollardan birinin müəllifi olan ispaniyalı cinah müdafiəçisi Sesar Aspilikueta hazırda əzələ zədəsindən əziyyət çəkir və meydana çıxması sual altındadır.
00:00 “Vilyareal” (İspaniya) – “Yuventus” (İtaliya)
Baş hakim: Daniel Zibert (Almaniya)
Vilyareal. “Estadio de la Seramiko” stadionu
Oynamayacaqlar: Fransis Koklen, Xerard Moreno, Ruben Penya (hər üçü “Vilyareal”), Federiko Bernardeski, Corco Kyellini, Federiko Kyeza, Paulo Dibala, Daniele Ruqani (hamısı “Yuventus”)
Oynayacağı sual altında olanlar: Etyen Kapu, Covani Lo Çelso (hər ikisi “Vilyareal”), Leonardo Bonuççi, Luka Pelleqrini (hər ikisi “Yuventus”)
Komandalar indiyədək rəsmi turnirlərdə üz-üzə gəlməyib. Yalnız 2009-cu ilin avqustun 7-də tərəflər yoxlama oyununda qarşılaşıb. Onda da İspaniya klubu İtaliya nəhənginə böyük hesabla – 4:1 hesabı ilə qalib gəlib. Heç də yaxşı günlərini yaşamayan “Yuventus” bu matça da itkilərlə çıxacaq.
Qeyd edək ki, 1/8 finalın ilk 4 görüşündə “Mançester Siti” (İngiltərə) Lissabonda “Sportinq”ə (Portuqaliya) 5:0, PSJ (Fransa) Parisdə Madrid “Real”ına (İspaniya) 1:0, “Liverpul” (İngiltərə) Milanda “İnter”ə (İtaliya) 2:0 hesabı ilə qalib gəlib, “Bayern” (Almaniya) isə Avstriyada yerli “Zalsburq”la heç-heçə edib – 1:1.
pia.az