Əfqanıstanın keçmiş Rabitə naziri Almaniyada poçtalyon işləyir
2020 -ci ilin sonuna qədər Əfqanıstanın Rabitə naziri işləmiş Səid Səadəti, Qani hakimiyyətinin «Taliban»a verdiyi ilk qurbanlarından saymaq olar.
Ovqat.com-un məlumatına görə, 2020 -ci ilin sonlarında Qani hökuməti «Taliban»a qarşı mübarizə tədbirlərini genişləndirmək üçün bəzi «kadr islahat»larına getməyə başlamışdı. Məqsəd həm narazı xalq kütlələrini «Əşrəf Qani islahatlara start verdi» qənaətinə gətirmək üçün bəzi gözdən pərdə asan addımlar atmaq, həm də qənaət edilən büdcə vəsaitini «Taliban»la döyüşən əsgərlərə maaş kimi vermək idi. Nədən ki, ABŞ Əfqanıstandan çıxmağa qərar vermiş və Əfqan ordusunu maliyyələşdirməyi dayandırmışdı.
Əşrəf Qani də bürokratik aparatı daraltmış, bəzi nazirlikləri ümumiyyətlə ləğv etmiş, bəzi strukturları bir-birinə birləşdirmiş, minlərlə məmuru işdən çıxartmışdı. Səid Səadətin bəxtinə isə rəhbərlik etdiyi nazirliyin ümumiyyətlə ləğv olunması düşmüşdü.
Rabitə Nazirliyinin ləğvı xəbərini eşidəndə əvvəl qulağına inanmayan sabiq nazir bir müddət qərara dirənsə də sonunda Prezident fərmanı ilə razılaşmalı olur və perspektivi xoş görünməyən ölkəni tərk etmək qərarına gəlir. Əfqanıstanda ələ gələn bütün mülkiyyətini satıb Almaniyaya gedir. Bir müddət Əfqanıstandan gətirdiyi pulla başını girələyir, cibi boşalanda isə sonuncu «qaragünlüyü»nü verib bir velosiped alır. İndi həmin velosipetlə Almaniyanın Liepzig şəhərində «Lieferendo» adlı özəl poçt şirkətində poçtalyonluq edir.
pia.az