Azərbaycanın icazəsi olmadan Rusiya jurnalistlərinin və bloqqerlərin Qarabağa girişinə niyə icazə verilir?
Millət vəkili: “Ermənistan ərazisindən ermənipərəst rus bloqqerlərin Qarabağa səfərlər etməsi qanuna ziddir”.
“Azərbaycan Qarabağa səfər edən belə şəxslərə qarşı istənilən vaxt anti-terror əməliyyatı keçirib, onları zərərsizləşdirməlidir. Çünki bilinmir ki, onlar Qarabağa gələrkən tək özləri gəlirlər, yoxsa özləri ilə müəyyən silah-sursat, başqa vasitələr də daşıyırlar”.
Bu sözləri millət vəkili Fazil Mustafa Ermənistan ərazisindən ermənipərəst rus bloqqerlərin Qarabağa səfərlərini PİA.az-a şərh edərkən qeyd edib.
Son günlər Ermənistan ərazisindən ermənipərəst rus bloqqerlərin Qarabağa səfərləri artmaqdadır. Qanunsuz olaraq sərhədlərimizi keçərək ölkəmizin ərazilərinə gələn bu bloqqerlər sonradan bitərəfli və qeyri-obyektiv məlumatlar yayaraq Azərbaycana qarşı qarayaxma kampaniyası aparırıar.
Rusiya sülhməramlılarının Azərbaycanın icazəsi olmadan Rusiya jurnalistlərinin və bloqqerlərin Qarabağa girişinə icazə verməsini necə dəyərləndirmək olar? Sülhməramlılar tərəfindən Azərbaycanın və beynəlxalq qanunların pozulması ölkəmizin suveren hüqüqlarına hörmətsizlik deyilmi və Azərbaycan buna görə Rusiya sülhməramlılarına, o cümlədən sülhməramlıların komandanlığına açıq xəbərdarlıq etməsi zərurətə çevrilmirmi?
Mövzu ilə bağlı PİA.az-ın əməkdaşı millət vəkili Fazil Mustafaya müraciət edib.
Fazil Mustafa: “Azərbaycan vətəndaşlığı olmayan hər kəsin Laçın dəhlizindən keçməsinə imkan verməməlidir”.
Azərbaycanın hər hansı bir şəkildə Qarabağa Ermənistan vətəndaşı olmayan şəxslərin daxil olmasının qarşısını almağa çalışmalı olduğunu vurğulayan millət vəkili bildirib ki, bu bizim imzaladığımız bəyanatın ruhuna ziddir:
“Ermənistan ərazisindən ermənipərəst rus bloqqerlərin Qarabağa səfərlər etməsi qanuna ziddir. Bu məsələni Azərbaycan Rusiaya rəhbərliyi və sülhməramlıların komandanlığı qarşısında qaldırmalıdır. Azərbaycan çalışmalıdır ki, hər hansı bir şəkildə Qarabağa Ermənistan vətəndaşı olmayan şəxslər daxil olmasın. Çünki bu bizim imzaladığımız bəyanatın ruhuna ziddir.
Azərbaycan Laçından keçərək Qarabağa səfər edən belə şəxslərə qarşı istənilən vaxt anti-terror əməliyyatı keçirib, onları zərərsizləşdirməlidir. Çünki bilinmir ki, onlar Qarabağa gələrkən tək özləri gəlirlər, yoxsa özləri ilə müəyyən silah-sursat, başqa vasitələr də daşıyırlar.
Qeyd edim ki, həmin şəxslərin Qarabağa başqa vasitələr də gətirməsinə imkan yaradılır. Buna görə də bu məsələ ciddi şəkildə qaldırılmalıdır. Azərbaycan vətəndaşlığı olmayan hər kəsin “Laçın dəhlizi”ndən keçməsinə imkan verməməlidir”.
Nərminə UMUDLUpia.az